Nos ta den e dianan cu mester entrega declaracion y haci pago mensual di por ehempel BBO, loonbelasting, toeristenheffing etc., pa cu e luna di september 2018.
Dialuna awo dia 15 di oktober, ta ultimo dia pa entrega e declaracion y haci e pago di impuesto.
Ta sumamente importante pa cumpli na tempo cu e dos responsabilidadnan aki y no entrega e declaracion y/of haci e pago dia 16 di oktober (1 dia of mas dia) laat. Nos sistema automatisa lo genera un “naheffingsaanslag” inclui boet pa e clientenan cu no a entrega nan declaracion na tempo y/of no a paga na tempo.
Si ta haci pago via banco mester tene na cuenta cu e dia cu e suma wordo deposita riba nos cuenta, ta determinante. Por averigua cu banco con largo ta dura pa procesa e pago. Alabes nos ta conseha pa NO haci pago via Transfer sino via e Online Bill Payment cu a wordo adapta specialmente pa por procesa e pagonan di impuesto na un manera structura y eficiente.
Nos ta conseha pa no warda te na ultimo pa haci pago via banco.
Pa loke ta e declaracion mes, NO uza e formulario di un otro periodo. Tur formulario di declaracion ta contene e datonan valido pa un periodo specifico. Por ehempel: no uza e formulario di november 2018 pa haci declaracion di september 2018. Esaki tambe lo por causa un naheffingsaanslag despues.
Un boca bisa otro y keda sigui nos pa mas informacion y tipnan valioso!