Rubin Ponson, experto den explosivo trahando cu DOW ta e cara mas conoci fin di aña. Hunto cu un comision instala door di gobierno ta encarga pa monitorea compra, benta y almacenamento di klapchi y vuurwerk den temporada di fin di aña.
Nan trabou ta cuminsa for di inicio di aña haciendo recapitulacion di nan trabou di e aña anterior y despues inmediatamente ta cuminsa cu proceso di papeleo pa loke ta importacion di e materialnan aki. Reunion cu importadornan ta un aspecto hopi importante pa mira cu nan ta cumpli cu tur e exigencianan di Gobierno. Y pa despues nan mes inicia e proceso pa importa e materialnan aki for di China. “Por bisa cu e proceso aki ta practicamente cla. Ta den preparacion di e materialnan pa wordo manda Aruba,” Ponson a splica.
Ultimo añanan, el a splica, por a nota cu e bentanan ta cay. Aunke esaki ta loke ta traha cu ne, pa wanta importacion abou pa no keda cu mucho klapchi pa warda despues di cambio di aña.
Te ainda no tin un fecha definitivo riba cual e containernan ta yega Aruba, ya cu nan no a sali di China mes ainda. E unico cos cu sa sigur ta cu e containernan mester yega prome cu 1 di december.
E cantidad di bendedornan no ta conoci ainda, pa motibo cu a concentra pa finalisa e proceso cu e importadornan prome. Pero pa esnan cu kier bende klapchi, Ponson a recorda cu e ultimo fecha pa entrega peticion pa bende ta 12 di november. Aruba lo bay importa un total di 15 container di klapchi, si tur cos bay segun schedule.