Dia 10 di September ta ‘Caribbean Wellness Day’

Caribbean Community (CARICOM), ta un organisacion Caribense cu ta concentra riba enfermedadnan cronico. Pa conscientisa comunidad riba e enfermedadnan aki y nan desaroyo, e organisacion a establece un ‘Caribbean Wellness Day’ (CWD). Desde aña 2008 el a bira un evento anual, cu ta wordo conmemora y celebra riba e di dos diasabra di luna di september. En conexion cu celebracion di e aña aki, e concentracion di ‘Caribbean Wellness Day’ ta riba mucha, cu e tema: “Muchanan sano den ambiente sano”.
‘Caribbean Wellness Day’ ta un evento pa conscientisa tur esnan cu ta biba den e region di Caribe pa nan cuida nan salud.
Promoviendo e tema y concentrando riba nos muchanan, IBiSA conhuntamente cu Plataforma di Promocion di Salud a manda informacion na tur Scol Preparatorio y Scol Basico riba e ‘Caribbean Wellness Day’, cu e meta pa comparti e mensahe di salud cu tur mucha. Diferente instancia a ofrece na aporte pa celebracion di e fecha aki.
Santa Rosa ta ofrece pa duna ‘rondleiding’ na tur scol cu ta interesa. Instituto Biba Saludabel y Activo (IBiSA) y Jeugd Gezondheidszorg (JGZ) ta ofrece pa duna charla di nutricion, si tin scol ta desea esaki.
IBiSA ta recomenda mayornan pa pone atencion riba e tema aki na cas y pa dialoga cu e muchanan tocante e decision pa biba un bida saludabel. Algun topico cu lo por papia cu e muchanan ta:
Con pa come saludabel: Esaki ta encera come desayuno, fruta y berdura tur dia y bebe por lo menos 8 glas di awa pa dia;
Haci actividad fisico: Actividad fisco ta saludabel y por wordo haci na un manera cu ta agradabel pa e muchanan. Importante ta pa nan haci 60 minuut di movecion pa dia;
Splica nan di e peliger di humamento y con pa cuida nos medio-ambiente.

Comments

comments