DEN HAAG – Mentor di Arubahuis Yuraima Henriquez-Rodulfo di regio Arnhem, Nijmegen y Wageningen ta duna pa medio di e articulo aki informacion di vivienda pa studiante pa e ciudadnan menciona . Como mentor di Arubahuis bo ta guia studiante ora cu nan ta na Hulanda. Pero e guia ta cuminsa cu dunando informacion na e studiante cu ta dicidi di bin studia na Hulanda. E decision ey hopi biaha ya caba ta wordo haci den e aña prome cu examenjaar. Si bo kier bin studia na 2019-2010 of e aña despues, e prome stap na momento cu bo a haci e decision aki ta pa busca vivienda na Hulanda. Si bo ta duda riba cua estudio bo ta bay sigui of bo no ta sigur na cua ciudad bo kier studia, toch ta importante pa inscribi bo mes na tempo pa un vivienda. Mas trempan bo inscribi bo mes mas posibilidad y seguridad bo tin pa un vivienda ora bo yega Hulanda.
Importante pa haya vivienda na Arnhem, Nijmegen y Wageningen;
Un opcion pa haya un camber ta via Hogeschool of Universiteit. Na momento cu bo scoge un opleiding, check riba e website di e school si tin posibilidad pa haya camber. Pa e opcion aki bo mester ta na tempo, pasobra tin hopi studiante internacional cu ta aplica pa e cambernan.
Pa haya vivienda na Arnhem of Nijmegen ta importante pa bo inscribi bo mes prome cu
1 november 2018 na SSHN. E deadline aki ta pa si bo kier haya un camber na juli, augustus of september 2019. E maneho di SSHN ta cu tur eerstejaars studenten ta cuminsa cu un camber chiquito. Pa studiante cu yui tambe tin posibilidad pa vivienda via SSHN.
Pa loke ta trata Wageningen bo por inscribi na Idealis entre 1 januari y 7 januari 2019. E ora bo ta sigur cu bo por haya un camber na tempo.
Pa inscribi bo mes na e website nan pa un camber na Arnhem, Nijmegen y Wageningen bo por yena un postcode fictivo riba e inschrijfformulier. Aruba no conoce e sistema di postcode. Yena por ehempel 1111 AA (4 cifra y 2 letter mayusculo). Ta keda importante pa semper lesa e website bon prome cu bo inscribi bo mes.
E siguiente websitenan ta importante pa busca vivienda;
Arnhem & Nijmegen;
– https://www.han.nl/international/english/information-for-international-students/housing/
– https://www.sshn.nl/
– https://www.entree.nu/
Wageningen;
– https://www.idealis.nl/
Pa cualkier pregunta bo por acerca e instancianan nombra of e mentor di Arubahuis pa Arnhem, Nijmegen y Wageningen, Yuraima Henriquez-Rodulfo via email [email protected] of whatsapp na number 0031-610584441. Arubahuis y mentor Yuraima Henriquez-Rodulfo ta desea tur futuro studiante hopi exito cu nan preparacionnan pa bin studia na Hulanda.
Nota pa redacion: E potret ta cortesia di Cas di Aruba