Diaranson ultimo, dia 10 di october 2018, a tuma luga na Cas Ceremonia di Gobernador un ceremonia di naturalisacion. En total di 81 persona, despues di a huramenta dilanti di S.E. Gobernador Alfonso Boekhoudt, a obtene e nacionalidad Hulandes. Esaki tabata e di tres naturalisacion pa e aña aki, cu un grupo hopi diverso cual nan edad ta varia di entre 18 te cu 73 aña y procedente di 10 pais diferente. E ceremonia a wordo compaña musicalmente pa e guitarista Jersey Sophia.
Algo remarcabel den e ceremonia di naturalisacion aki tabata e presencia di un interprete di lenguahe di señas cu tabata traduci e texto habla den lenguahe di seña pa un persona naturalisa cu’n deficiencia auditivo. E interprete aki ta procedente di Fundacion pa Esnan cu Deficiencia Auditivo Aruba (FEDAA). E fundacion aki tin como meta pa duna tur persona cu problema auditivo e miho guia posibel pa asina nan por funciona optimalmente den e comunidad Arubano.
Mas informacion tocante con pa obtene e nacionalidad Hulandes por wordo haya ariba e website di gobierno di Reino (Rijksoverheid).