Diaranson ultimo e di dos grupo di funcionarionan di Departamento di Aduana, di seccion Aeropuerto y seccion Waf, cu ta traha principalmente cu biaheronan a ricibi nan certificado
di Mi Compromiso cu Aruba.
Departamento di Aduana pa un tempo caba tabata den combersacion cu diferente stakeholders pa asina mehora e comunicacion y servicio pa y cu biaheronan. Durante e training e duaneronan a ricibi “tools” pa eherce nan trabounan den un forma mas eficiente y servicial sin kita e meta cu Aduana tin di cumpli cun’e. E tarea primordial di e trabounan di Aduana ta pa cobra invoerrechten y accijns, pero tambe salvaguardia e interesnan di pais Aruba riba e terenonan di salud publico, medio ambiente, siguridad y economia.
E trabounan aki cu Aduana ta eherce ta wordo haci door di eherce nan control e.o na frontera. Durante e training nos funcionarionan a siña tacticanan con pa bay “the extra mile” na momento cu ta hectisch y tin situacionnan cu tin di haber cu stress. Banda di esaki e funcionarionan a bin cu ideanan, solucionan y puntonan di mehoracion cu lo wordo treci dilanti na e stakeholders pa asina por mehora e fluho di pasahero y e experiencia di nos biaheronan