Departamento di Salud Publico (DVG) ta contento di por celebra cu e di dos grupo cu a gradua pa e estudio di “Maatschappelijk Gezondheidszorg”. Esaki ta un estudio cu por a wordo logra aki na Aruba cu ayudo di Instituto pa Formashon den Enfermeria (IFE) di Corsou. Meta di e estudio aki tabata pa habri posibilidad pa e enfermeronan cu nivel di MBO por sigui un estudio den ramo di salud riba nivel di HBO na Aruba mes, asina Director di DVG, Drs. Jerry Starring a remarca. Den e prome grupo tabatin 12 persona cu a gradua y den e di dos grupo 6 mas a gradua. Asinaki a finalisa e estudio aki cu a cuminsa 2 aña y mey pasa.
E estudio aki lo no yuda solamente Departamento di Salud Publico pasobra tin varios ‘verpleegkundige’ den diferente departamento trahando, pero Jerry Staring ta kere cu henter salubridad na Aruba ta beneficia di esaki pasobra e estudio aki ta yuda na eleva e calidad di enfermeronan di Aruba. Nos lo por mira un realse no solamente den conocemento, pero tambe den desaroyo propio.
Na september 2014 Instituto pa Formashon den Enfermeria a cuminsa cu e estudio aki pa enfermeronan cu tin un diploma caba di MBO y awo nan a logra pa haya diploma di HBO, asina director Interino di IFE di Corsou, Natalie Garmes a remarca. E specialisacion aki ta cu e studiantenan ta haci 1 aña basico y despues ta haci un escogencia den direccion. Nan por scoge e parti di “Algemene gezondheidszorg” (AGZ) of “Geestelijke Gezondheidszorg” (GGZ). E parti di GGZ ta pa nan specialisa pa traha den psikiatria y AGZ ta pa nan specialisa nan mes pa por traha den e parti di “wijk, jeugd gezondheidszorg” den salubridad na Aruba.
Un total di 18 studiante a termina e estudio aki, pero tin 1 studiante pendiente y ora cu esaki tambe termina lo tin 19 profesional pa salubridad di Aruba. Tin necesidad pa cuminsa cu un di dos grupo. “E ora ey probablemente na september di e aña aki, nos lo cuminsa cu un di dos grupo”, Natalie Garmes a remarca.
Esunnan cu kier participa por tuma contacto cu Rafael Lopez na SPD pero tambe na DVG, telefon 522-4200 y eynan por haya informacion unda pa aplica pa inscribi.