Minister di Infrastructura, Sr. Benny Sevinger a splica cu tin un comision di expertonan cu Minister De Meza a institui. Den e caso aki lo tin representante di Serlimar tambe, caminda tur e partidonan ta ariba e mesun liña y ariba un termino largo, nan lo bin cu sugerencianan a termino largo pa asina wak ki decision lo tuma encuanto e situacion di e landfill.
Tur loke a wordo treci riba dump, for di 2006, dus 10 aña di landfill lo por haci algo cun’e, door cu e ta registra. Dus ki decision cu wordo tuma den futuro, sea ta insinerado of wasteful energy, lo por baha e cero actual y mescla esaki cu e sushi nobo y poco poco disminui e cantidad di sushi.
Minister Sevinger ta enfatisa, cu tin un comision actualmente, paso cada biaha e datonan ta cambia, e tonelada di sushi cu tabata tin algun aña pasa ta cambia, sector priva ta tuma parti di e sushi. Cada rato mester bin cu cosnan nobo ariba mercado cu mester wordo evalua. Pero mester bin cu decision cu ta duradero y cu lo tin solucion sigur pa largo plaso y esey ta e meta di colega de Meza.
Actualmente, tur cos ta wordo evalua, ya cu den mundo actual tin no solamente un dump manera di Aruba, pero tin centronan na diferente partinan. Pa di prome, e lo yuda cu e trafico di truck pisa cu mester core rond Aruba pa yega na un luga y lo yuda controla e sushi. Cada centro lo ta destina pa un solo tipo di desperdicio. Tur esaki, e comision ta bezig ta evaluando pa bin cu solucion pa cu esaki. Segun Minister Sevinger, esey ta e caminda pa cana. Gobierno lo kier pa mas pronto posibel yega na un solucion, manera priminti na e habitantenan, pa asina nan tin un trankilidad mental y tambe miho salud. Ta tene cuenta cu e comunidad en total, pero specialmente e bario di Parkietenbos.
A puntra Minister si no por bende e sushi pa e compania priva cu ta kima pa traha gas pa WEB y esaki lo yuda na baha e sushi, cual segun Minister e compania mester ta cla pa esaki y actualmente, esey no ta e caso, segun Minister Sevinger.