Ora cu Gobierno actual a asumi responsabilidad, tabatin diferente ambtenaar cu mester a bay bek nan departamento y otronan cu a bay cas segun terminacion di nan contract. Tabatin un caso specifico di un ambtenaar di DOW sra. Noraima Vidola cu aña pasa tabata envolvi den un sosedido cu a causa cu DOW ya no ta desea di tin e señora den su servicio mas, como cu e persona a comete un acto cu inacceptabel pa loke ta su responsabilidadnan laboral.
E ambtenaar en cuestion tabata traha na e Waterzuiveringsinstallatie (RWZI) di Bubali. El a bandona su pia di trabou sin notifica niun hende cual a conduci cu pa oranan largo e awa di riool cu ta bin na e RWZI a bay lama. Ocasionando consecuencianan grandi negativo pa nos medio ambiente y naturalesa. Un acto contra derechonan y tratadonan internacional considerando e magnitud di e daño.
E persona despues no kier a duna oido na director di DOW pa raporta y responsabilisa su mes tampoco pa e susedido y al contrario a tuma un actitud di “niun hende no tin nad’i bise”. E ambtenaar a wordo protegi tur tempo pa e Minister anterior di Infrastructura door di a pone ‘ter beschikking’ di e Minister.
Na momento cu Gobierno a cambia e persona mester a bay bek su departamento pa cual DOW a bisa cu no ta acepta e persona. Minister anterior a purba overplaats e persona pa un otro departamento esta Ministerio Publico, sinembargo OM a mustra tambe di no kier e persona, mescos a tuma lugar tambe cu Departamento di Salubridad Publico. Te cu na cierto momento e persona awordo yama pa presenta na pia di trabou bek cual e no a haci tampoco y a bay cu a.o. y ta cu a.o te na e momentonan aki. A pesar cu e Tabata cu a.o, a mira cu e persona tabata bay fiestanan y carnaval mientrastanto, cual no ta comportacion adecua pa un ambtenaar riba a.o.
Consecuentemente a tuma e decision recientemente cu ta prohibi entrada di e persona na su trabou anterior. Medidanan disciplinario a cuminsa contra dje a base di e raportahe cu DOW a traha di e caso. E caso ta wordo investiga pa deduci exactamente cuanto daño a wordo cometi, pa mira si cierto momento lo por pone e persona para responsabel pa esaki. No por permiti cu e tipo di cosnan aki ta tuma luga, un bon ambtenaar mester actua manera un bon ambtenaar y mester tin e responsabilidad tambe. Tin dos hecho importante cu ta hunga un rol esta e hecho di negligencia di trabou cu a tuma luga y e hecho cu riba a.o tabata sali festeha.
Mester enfatisa cu e persona nunca a presenta na pia di trabou desde despues di e susedido y ta cobrando ketobay. E ambtenaar mester wordo brinda e oportunidad pa duna su banda di medaya tambe, y unabes cu esey wordo brinda, e ora decisionnan lo mester wordo tuma den un Landsbesluit cu Gobernador ta firma hunto cu Gobierno. Tur cos ta den man di DRH pa actua y pa duna straf disciplinario.