Den ora nan di dialuna mainta di 12 di mei, autoridadnan a tuma nota di un boto sospechoso nabegando den direccion di Barcadera. Inmediatamente a dirigi unidad nan riba tera y tambe lama pa asina investiga e situacion den area di Parkietenbos. Durante di e buskeda, a bin topa cu un boto na parti zuid di e dump bieu. E boto tabata bandona y tabata contene un cantidad di pakete sospechoso. Hunto cu Polis y otro autoridadnan inmediatamente a continua cu e buskeda y a bin topa cu un persona sospechoso cu tabata scondi den e area di Parkietenbos. E persona aki di nacionalidad Venezolano, a ser deteni mes ora. Autoridadnan ta buscando 2 persona mas cu tambe tabata riba e boto.
Mientras tanto a logra di controla e contenido di e pakete nan y a constata cu ta trata di un cantidad grandi di marihuana. Esaki a ser destrui y autoridadnan ta sigui cu e investigacion y tambe cu e buskeda di e otro dos persona nan.
Caso den ora nan di anochi
Den ora nan di dialuna anochi di 12 di mei, autoridadnan a tuma nota di un boto sospechoso nabegando den direccion zuid oost di Aruba. Inmediatamente a pidi personal di e avion DASH-8 di Wardacosta pa acerca nan mes na parti zuid oost pa asina por investiga e boto. A tuma nota cu e boto a yega tera y un total di 7 persona indocumenta a cuminsa core pa asina por sconde. Inmediatamente unidad nan di Polis, Wardacosta y tambe personal di Guarda Nos Costa, a inicia cu un buskeda riba tera. E avion a sigui bula pa asina por ilumina e area y relativamente lihe, personal di polis y wardacosta riba tera, a logra di localisa tur 7 persona indocumenta. Ta trata di 7 persona di nacionalidad Venezolano. Polis a detene e 7 personanan y tambe a confisca un cantidad di droga (un mix di cocaina y marihuana) y 2 arma. Mientrastanto a destrui tur droga y a sigui cu e investigacion.
