Despues cu imigracion a detene un persona na aeropuerto pa ta un ilegal, a caba den detencion di tres persona mas trahando na un asina yama cas di anciano.
E situacion a cuminsa ora cu imigracion na aeropuerto a para un dama, kende no tabata tin e rekisitonan necesario pa por drenta Aruba. Na momento cu a pidi pa e persona cu ta para garante (un persona cu ta para responsabel pa un huesped cu ta bin for di exterior) pa e dama bin padilanti y duna cuenta, a bin resulta cu esaki ta un persona ilegal. Di inmediato personal di imigracino a detene e dos personanan aki.
A bin resulta cu e garante ilegal ta trahando na un luga cu yama Oasis, cu ta un cas di anciano.
Despues di a haya e informacion aki Imigracion a yama personal di Warda nos Costa pa asina bay na e sitio ya menciona pa tene un control. Eynan nan a bin topa cu un mama, un yiu muhe y e casa di e yiu muhe, tur indocumenta, trahando na dicho luga. Segun cu tin entendi, e personanan aki tabata traha na e cas di anciano como pago pa keda eynan. E doño di e luga mes ta cobra 1800 florin pa cada anciano cu ta keda eynan, cual ta suma un total di 20 persona, sumando en total di 36 mil florin pa luna. Un suma cu sigur, por afford personal decente pa por cuida di anciano.
Warda nos Costa a tuma over e caso aki y e personanan deteni a wordo hiba na Dakota pendiente deportacion.