Sorto di Cocolishi, cleconchi, gengo, cangreu blou y di mondi y kiwa ta core riesgo di disparce den nos naturalesa. Delaster tempo esunnan cu ta come e cangreu y cocolishinan aki ta destrui y ta piki mas cu nan por come. Si no bin un paro na pikimento di e sorto di faunanan menciona ta caba cu nan. Cu man Fuerte mester para ariba pa laga e sortonan aki rende. E hembra cu ta procreado no ta wordo respeta. Ta piki loke cu ta den nan caminda y hasta cu cabutiti. Nan ta weita masha bon cu e cangreu y soldachi ta pa procrea. Ta kiko lo resta pa generacionnan pa futuro? Por cumpra cocolishi den supermarcadonan cu ta special pa consumidornan cu ta gusta cuminda di lama. Cantidad di baby calco ni a haya oportunidad pa crece y madura. Den Aruba su constitucion e ta menciona y ta cay bou di CITIES, e ta protehi pa ley. Cangreunan blou cu kier crusa e caminda na Rooi Lamoenchi ta core riesgo di wordo atrapa. Hopi cangreu cu ta carga cu cabutiti por lo menos 60% ta worde placha riba caminda. Antes e trayectoria di e cangreunan tabata bou di e caminda, tabata mas hancho y traha di cement den largura. Loke a traha aña pasa ta diferente. Awor ta cu pipa rondo di otro material a traha e pasada. Tengla di cangreu no ta gara bon na e material y nan ta subi pasa riba tur obstaculo pa bay riba caminda pa bay nan destino pa laba e cabititi den lama, hopi no ta yega nan destino, cu tur consecuencia cu tin.. Riba caminda mayor no por exigi ningun chauffeur pa para nan vehiculo pa bestia crusa. Otro parti di mundo ta tene consideracion cu bestianan cu mester crusa den luga of barionan pobla unda tin trafico di motor. Awor nos cangreu y soldachinan ta core riesgo den man di hende cu ta piki demasiado soldachi y ta core riesgo di caba cu nan. No ta duna Calco oportunidad pa crece asina por yega un dia cu lo ta fin di nan existencia. A destrui Kiwa nan habitat, antes ta mira nan riba baranca canto di awa, awe ya e kiwa ta yegando su final. Cocolishi di galiña poco poco a destrui e mata di Taya y mangel. Nan vivadera a rosa for di Sero di Teishi te Pos Chikito. Hasta esunnan cu ta den awa pega na e mangelnan a wordo destrui. Nan ta parti di nos naturalesa y na tin nan funcion den nos naturalesa.