Den un wega riba un nivel haltisimo diasabra atardi den stadion Guillermo P. Trinidad a tuma luga e wega entre e number 1 di campeonato esta Sv Britannia Frisian Flag contra Dep. Nacional Coca Cola number 2.
Sv Britannia Frisian Flag a cuminsa cu e siguiente alineacion; Lionel Kaarsbaan, Aljee Feleciana, Rodymar Paeash, Derwin Donato, Sylvester Schwengle, luis “Coco” Estrada, Renier Paraez, Johnatan Ruiz, Alex Hassel, Bruno Conceiçao y Richard van der Hoest.
Como suplente tabata tin; Ericson Croes, Keano Maduro, Mairon Gutierrez, Theric Ruiz, Luis Carlos Croes, Kendrick Dania, Jeanpierre Fingal y Miguel Gutierrez. E prome goal ta cay despues di un bunita combinacion cu ta sali for di e keeper Lionel pa Rudy pa Power pa Coco pa Bruno pa Renier bek pa Bruno y bek pa Renier y unda Renier ta lastra e bala banda di e keeper di Nacional pa manda su team Britannia ariba 1-0 na di 8 minuut di wega. Cu e score di 1-0 pa Sv Britannia Frisian Flag halftime ta bay aden. Den di dos tempo Nacional ta sali preta e wega y ta Power cu ta perde e bala mey mey di tereno y e delantero di Nacional ta haya e bala y cu lomba pa gol y ta wordo foulia pa Aljee y referee corectamente ta pita pinalty pa Nacional. Akinan e hungado number 10 Devis ta empata e wega na un gol pa banda. Pero no a dura mucho cu Sv Britannia Frisian Flag ta reaciona pa bolbe bay ariba 2-1 ora cu Bruno Conceiçao ta fusila e portero di Nacional. Asina e wega ta sigi desarolla y ta na di 57 minuut cu Killa ta bay laga ariba banda robes y ta duna un paso perfecto pa Ranger cu ta score e gol di empate 2-2. For di e momento ey tur hende tabata sa cu e team cu score un biaha mas casi sigur lo bay cas cu e 3 puntonan den wega. Tabata na di 82 minuut cu Coco ta ricibi un paso perfecto di Renier despues di un combinacion cu Sylvester Schwengle y Luis “Coco” Estrada ta subi na banda drechi di tereno y ta fusila e keeper di Nacional pa haci e wega 3-2 cu cual score e wega ta caba tambe y asina Sv Britannia Frisian Flag ta mantene su mes na prome luga cu 22 punto den 9 wega hunga. Un pabien grandi ta bay pa e hungadonan di tur dos team y staff technico. Na opinion di varios conocedo di futbol, e hombernan grandi pa Sv Britannia Frisian Flag sigur tabata Sylvester Schwengle y Renier Paraez. Diahuebs awo Sv Britannia Frisian Flag mester enfrenta e fuerte ekipo di Dakota cu ta na di tres luga cu 18 punto den 10 wega hunga. E wega contra di Dakota lo tuma luga den C.D. Guillermo Trinidad y lo cuminsa pa 8’or di anochi. Un pabien grandi ta bay pa e hungadonan, staff y fanaticonan di Sv Britannia cu e tremendo campaña futbolistico.