Partido MEP durante campaña a priminti di baha prijs di awa cu coriente y WEB ta indicando di proyectonan grandi pero no ta papia di un reduccion. Proximamente lo bin e introduccion di BAVP, cual lo pone cu prijs di tur cos lo subi sin tin un alivio di otro banda. Minister Presidente, Sra. mr. Evelyn Wever- Croes, ta splica mas ariba esaki.
A palabra cu WEB y Elmar cu unabes cu nan cuentanan anual ta cla y cu esakinan wordo revisa, lo por fiha e ora ki espacio tin, pa baha prijs di awa y coriente. Esakinan entretanto ta den posesion di Minister Presidente, pero lamentablemente, e prijs di fuel ta come un parti di e loke gobierno kier a uza pa baha prijs di awa y coriente. Sinembargo, e no ta come full y ta keda un espacio toch. Pero Minister President kier ta 100% sigur di esaki prome cu e anuncia esaki, despues cu nan caba di studia e cuentanan anual
MAS SORPRESA DESAGRADABEL
Siman pasa ASTEC NV a bati alarma caminda cu el a bisa cu tin gasnan dañino cu ta sali for di WEB y ta afecta su trahadonan, a sinta na mesa cu APA, ASTEC, WEB y Directie Natuur & Milieu. A bin resulta cu ora cu gobierno a dicidi di muda waf pa pabao di WEB, nan no a tene cuenta cu WEB tabata ta eynan for di hopi mas prome. Y cu e gasnan cu WEB ta emiti no ta semper e mihonan. Consecuentemente, descabelladamente a muda waf pa ayanan, niun hende a worry cu salud di trahadonan cu a bay traha eynan. Awo nan a presenta e cuenta den scochi di gobierno actual. Pero berdad ta tambe, cu lo mester bay paga pa sea pone filter, of WEB cambia su sistema di genera coriente y awa, cual tur ta costa placa. Y esaki ta loke tabata tin pone un banda pa baha prijs di awa y coriente. Naturalmente, ta di compronde cu gobierno no ta keda niun tiki contento cu tipo di sorpresanan desagradabel, cu nan a papia cu gobierno anterior pero no a haya oido. Y awo e gobierno tin cu atende cun’e. Pero e plan ta sigui pa baha prijs di awa y coriente.
Pa loke ta e plannan di gas, ta plan cu ta bay ta ariba termino mas largo. E ta bay exigi cierto inversion cu ta bay trece su frutonan ariba termino mas largo y lo baha e prijs di awa y coriente. Un proyecto cu pro baha e prijs di awa y coriente mas lihe, ta pa WEB bay over na mas motornan recip, cu ta bay baha e consumo di fuel y ta haci nos menos dependiente. Esaki ta den curso di otro aña caba cu por keda cla, cu lo por influencia e prijs pa otro aña.
Pero loke Minister Presidente tabata kier, ta pa logra baha e prijs di awa y coriente, prome cu e crisisheffing drenta na vigor.