Despues di mas di un siman di pleitonan familiar y un gran cobertura di parti media cu ta yen di desinformacion, e shinishi di e cantante Mexicano Jose Jose a yega Cuidad di Mexico, caminda multitud di hende tabata warda riba dje pa despidi di nan “Principe de la Cancion”. Dor di imagennan di television, un avion militar Mexicano facilita dor di Gobierno a trece e restonan di Jose Jose for di Miami y a baha e hanger presidencial di aeropuerto di Cuidad di Mexico. Poco despues, e yiu mas grandi, Jose Joel y Marysol, kendenan tambe a viaha hunto cu e restonan di nan tata a tene un conferencia di prensa y presente tambe tabat nan mama Anel Noreña. “No a trece bek e curazon di nos adorado principe di cancion, di mi tata, ya e ta na su patria, danki na tur hende pa boso tempo, boso pasenshi” asina Jose Joel a declara. E ruman muher tambe a gradici tur hende. Un shersh estilo clasico a para banda di e avion militar y e caha di morto a wordo baha y hinca den dje p’asina e por sali rumbo pa e centro artistico conoci como “Palacio de Bellas Artes” caminda e restonan di e cantante a wordo poni na disposicion pa wordo bishita pa ultimo biaha. Eynan el a haya su homenage nacional. E restonan mortal di Jose Romula Sosa Ortiz, su nomber real, a wordo crema Diamars cu a pasa na Floridaby e shinishi a wordo dividi entre Jose Joel y Marysol, kendenan ta yiunan di su segundo matrimonio, y su yiu menor, Sarita, cual el a haya cu su terer casa, e Cubana Sara Salazar. E homenage organiza pa Gobierno den Palacio di Bellas Artes, cu ta e maximo lugar cultura di e pais tabata uno grandi cu miles y miles di hende cu acudi eynan. Rond di e luga tabatin filanan di admiradornan di tur edad, cargando potretnan di e artista y cantando algun di su canticanan mientras nan tabata warda yegada di e corteho funebre. Orkesta Sinfonica Nacional compaña pa cantantenan di Opera a interpreta algun di su cancionnan mas famoso manera “La Nave del Olvido, El Triste, Almohada y O Tu y Yo”, entre otro. Na e Basilica di Guadalupe tambe un misa a wordo haci. E corteho funebre a pasa tambe pa e bario “La Claveria” cual ta e bario caminda e cantante a nace y biba y caminda tin un standbeeld na su honor. Su e restonan, of por le menos e mitar di su restonan, pasobra mita di esakinan a keda Miami, lo wordo dera den un panteon di centro di cuidad hunto cu mama kende tabata pianista. Segun medionan di comunicacion Mexicano y na Merca, e ultimo voluntad di Jose Jose a tabata di wordo crema y e yiunan a yega na un acuerdo cu mita di e shinishi lo keda Miami, caminda el a fayece dia 28 di September ultimo na edad di 71 aña. Den un discusion bastante fuerte entre e yiunan di Jose Jose, te hasta e presidente Mexicano, Andres Manuel Lopez Obrador a intermedia. Te Dialuna pasa ainda, Jose Joel a publica riba rednan social cu el a logra para e cremacion pa 48 ora y a declara cu e no ta di acuerdo pa dividi e shinishinan. Jose Jose ta wordo considera un di e voznan mas previlegia entre cantantenan Mexicano. El a adopta e nomber artistico despues di e morto di su tata ns 1968, kende tambe tabata yama Jose. El a wordo yama tambe “El Principe” dor di un disco cu e mesun titulo.