Fiscal General di Sint Maarten, Corsou, Boneiro, Sint Estatius y Saba a retira e apelacion di casacion fo’i Corte Supremo den e caso largo cu number “Colade” cu tabata envolve Regina LaBega, Fabian Badejo y otro envolvi.
A redacta un scritura na tal efecto (Akte van Cassatie) cu a firma dia 15 di november 2023, segun documento judicial dirigi n’e demandadonan.
LaBega a bisa cu el a alegra hopi ora cu su abogado a inform’e cu e caso a cera. “Tabata 13 aña di nachtmerrie cu mi no ta desea ni na mi pio enemigo,” el a bisa, “pero Danki na Dios cu el a caba.”
Fiscal General a presenta e apelacion na casacion despues di e decision di dia 17 di februari 2022 na Corte Conhunto di Husticia di Aruba, Corsou, Sint Maarten y di Boneiro, Sint Estatius y Saba, cu a faborece e acusadonan.
E caso a referi na acusacion di fraude, malversacion di fondo y pertenencia na un asina denomina “organisacion criminal,” tempo cu LaBega tabata dirigi e Oficina di Turismo di Sint Maarten (STB) na 2010. Despues di su paso door di STB, LaBega a converti den un di e directornan general mas exitoso di aeropuerto di SXM entre 2011 y 2016, logrando un cualificacion sin precedente di Moody’s de Baa2 y varios premio internacional p’e aeropuerto di e teritorio.
“Mi kier gradici mi famia y mi amigonan cu tabata band’i mi durante henter e calvario aki y a kere den mi inocencia. Tambe mi ta gradicido na mi abogado p’e excelente trabao cu el a haci,” LaBega a bisa.
Di su parti, Badejo a bis di ta encanta cu e noticia. “T’e miho noticia cu mi a scucha den varios aña. Dios ta bon. E oracionnan di mi mama di 91 aña na Nigeria a wordo scucha.” Badejo ta periodista, consultor di medio di comunicacion y escritor.
Abogado Safira Ibrahim, cu a representa Badejo, a splica cu e “caso ta cera y e sentencia dicta p’e Corte Mixto di Apelacion ta mantene y ta irevocabel.”
“Esey ta nifica cu bo a wordo absolvi di tur e cargonan presenta contra bo p’e fiscal,” Ibrahim a declara den e carta cu el a manda na su cliente.
“Mi ta hopi satisfecho cu e resultado aki y feliz cu a logra yega na un decision definitivo y faborabel, por fin. Bon mereci!,” e abogado a bisa.