Omaira Britten, e persona encarga pa representa empleadonan di La Linda ta splica cu ta importante pa pueblo di Aruba haya sa cu semper comerciantenan ta wordo intimida door di abogadonan aki na Aruba despues di declara bancarota.
E bewindvoerder pa La Linda awor tambe hues a nombr’e como curator. Sra. Britten a splica cu Peter Mohamed [Doño di La Linda] a manda un carta for di 1 aña pasa, 20 januari 2020, bisando cu La Linda NV ta debe La Linda Real Estate 1.960 miyon florin na huur, y cu tur cos cu ta den edificio ta solamente loke ta di material ta di La Linda.
“E tempo cu e meneer aki tabata bewindvoerder, niun dia e no a presenta pa tuma inventaris, y awor e kier pidi esaki y pa tur hende ta kinan, den scur, caminda cu La Linda no tin coriente,” segun sra. Britten. Y ayera a menasa cu e lo bin kibra e porta, na unda cu un caso a wordo manda recherche pasobra si e kibra e porta e lo mester paga daño y perhuicio pasobra e edificio no ta di La Linda.
E preocupacion ta cu si ainda tin cos personal di La Linda Real Estate, cu esaki no ta corecto pa otronan bini wak tur dia den edificio pa bin coba kico ta di nan of no, si tin papelnan importante etc.
“Ta insisti cu kier e yabi si no e ta bay tuma represaria, awor mi ta bisa pueblo, e comerciantenan, pensa bon ora boso kier bay pa un faillissement of surseance, pasobra e meneer aki por ehempel ta cobra surseance 550 florin pa ora, anto e ta wordo paga prome, kiermen ni belasting ni nada,” segun sra. Britten. Awor tur empleado di La Linda ta bay cas, pa haya cesantia y despues onderstand, e carga aki tur ta bay pa gobierno. “Mester haci un stop cu esaki pasobra hues tabata sa cu La Linda no mester a bay bancarota.”