Despues di 31 aña di sirbi e comunidad cu regalonan cu un toke personal y productonan holistico, nos conocido tienda Himalaya ta prepara pa cera su portanan riba 30 di november, 2023.
Himalaya, mas cu simplemente un tienda, ta un pilar di tanto recuerdonan keri. El a mira e inicio y florecimento di relacionan, a celebra momentonan importante y a yama tanto clientenan nobo como regular bonbini. Tur a bira un parti esencial di e famia di Himalaya.
“Nos ta sinti nos mes sumamente privilegia pa ta parti di asina hopi momentonan special den e bida di nos clientenan,” a declara un representante di Himalaya. “For di prome citanan te cu aniversarionan, cumpleañonan, y hasta conciertonan, nos a aprecia cada momento.”
Como muestra di agradecimento, Himalaya ta invita tur su clientenan keri pa bishita e tienda un ultimo biaha, pa refleha riba recuerdonan balioso y kisas crea algun nobo. Aunke e tienda fisico ta cerando, e laso cu Himalaya tin cu su clientenan lo keda pa semper.
E ekipo di Himalaya ta extende nan gratitud profundo pa e sosten y amor cu e comunidad a mustra durante decadanan. “No ta solo e final di un epoca, sino tambe un comienzo nobo. Aunke nos ta despedi, e esencia di Himalaya lo sigui biba den e curazon di tur esnan cu nos a tin e honor di sirbi.”
Asina Himalaya a informa riba nan pagina di facebook.