E Conferencia Anual de Turismo Aruba (CATA) ta tuma luga anualmente y ta ofrece un oportunidad balioso pa e socionan Latino Americano por relaciona y comunica cu e socionan clave di e industria riba nos isla. Tambe e socionan por experencia y disfruta di e desaroyonan cu ta tuma luga na Aruba. E conferencia aki ta wordo organisa door di A.T.A. den cooperacion cu Aruba Hotel and Tourism Association y Aruba Airport Authority N.V.
Durante e pandemia CATA a tuma luga virtualmente, di e forma aki manteniendo e presencia di Aruba den nos diferente mercadonan di Latino America, como tambe demostrando nos socionan cu nan ta importante pa nos. Mirando e recuperacion cu nos ta mirando y principalmente despues di 2 aña cu ta comunica unicamente di forma virtual, un confererencia presencial tawata importante e aña aki. Banda di esaki lo brinda e oportunidad pa participa di forma virtual tambe.
Aruba lo ta ricibiendo 53 participante internacional pa CATA cu lo ta yegando nos isla dia 4 di mei pa asina por participa den e diferente dianan di evento.
Pa loke ta e mercado di Latino America, mester bisa cu na 2021 a logra un recuperacion di 37% den comparacion cu 2019 cual a conduci na un marketshare di 4.9% pa Latino America. Mester tene cuenta cu no ta tur mercado tawata completamente habri y ainda tawata tin bastante restriccion den e mercadonan.
Pa e prome 3 lunanan di 2022 nos ta wak cu Latino America tawata tin un recuperacion di 50% den comparacion cu 2019, yegando asina na un ‘marketshare’ di 6.1%. Pa e resto di 2022 ta premira cu lo sigui recupera den e mercado di Latino America tambe. Meta ta pa logra un total di 100 mil bishitante na 2022. Na 2019 a ricibi un total di 106,679 bishitante for di e region aki.
