Durante di ultimo dianan por a tuma nota di rumornan basta persistente riba rednan social cu Aruba pronto lo por conta cu un radio station nobo riba e banda di FM. Hasta ta wordo menciona cu despues di 10 aña pariba di brug lo por conta un biaha mas cu un radio station riba e banda di FM pa cual nos a dicidi di sali y busca mas informacion si e rumornan aki por ta cuadra cu e realidad. E informacionnan preliminar ta mustra cu di berdad equiponan ultramoderno pa e station nobo aki a yega Aruba caba y ta instala wardando e aprobacion di DTZ pa den e proximo dianan cuminsa cu nan transmisionnan di prueba. Por corda cu ta exactamente 10 aña pasa pues na 2007 cu e ultimo radio station pariba di brug Radio Caruso Booy a cera su portanan y semper a keda un anhelo bou di e pueblo di San Nicolas pa haya un radio station bek pariba di brug. Tin basta speculacion den e lineup di djnan cu lo ta formando parti di e radio station aki pero gerencia ainda ta den e fase di negociacion y asina cu esaki ta cla nan lo tene un rueda di prensa pa asina anuncia e fecha di apertura como tambe kende ta esunnan cu lo ta encarga cu e programacion di e radio stacion nobo aki. Unico cos cu nan por a confirma pa awor ta pa keda pendiente pa e transmisionan di prueba proximamente di Massive 103.5 FM for di San Nicolas, Aruba.