Minister di Infrastructura, Desaroyo Teritorial y Medio Ambiente, Sr. Otmar Oduber a bisa di a tuma nota di declaracionnan di Sr. Booshi Wever pa loke ta e parti di procesamento nobo y e tecnologia nobo cu kier implementa, dentro di poco. Aki 5 luna e lo ta na vigor pa loke ta trata incineration, pa loke ta e desperdicio di loke ta trata e sludge cu ta wordo procesa door di DOW na e momentonan aki, pero cu na un manera inhigienico ta wordo procesa despues pa wordo tira na dump na Parkietenbos. Como tambe e mesun proceso aki, lo acapara e posibilidad animalnan cu wordo haya morto, ta wordo kima riba Parkietenbos tambe lo yega su fin. Tambe desperdicio medico, p.e. di hospital, oficinanan di dokter cu hopi biaha cu no ta wordo atendi cu nan cu ta segun e normanan cu ta trata esaki.
Den e caso aki, Sr. Oduber ta sumamente contento, unda cu gobierno ta canando un proceso hopi habri pa loke ta e maneho a largo plazo. Pa loke ta nos desperdicio, tin tres destaho publico tumando luga, cu’n cantidad di companianan local y internacional. Ta trata di inversionnan cuantioso y p’esey ta asina cauteloso.
Ta di lamenta cu te dia di awe, ta wak un pelea, mustramento di dede di Sevinger y Booshi Wever, pero ta pueblo a paga mas di 35 miyon florin, di Baldwin & Lawson cu nunca a mira luz di dia, cu nunca a traha na un forma adecua. Pero al contario tabata un perdemento di placa di e pueblo. Pero pa loke ta e procesamento di e proyecto aki, pa loke ta trata e parti di sludge y carcas di animalnan, esaki a cana un caminda normal di un destaho cu a tuma luga. Un total di 8 compania a wordo acerca door di DOW, al final tres compania a reacciona, dos a bay y a presenta un oferta. E dos ofertanan aki a wordo evalua conforme e rekisitonan cu tabata tin y a base di esaki, a tuma e decision cual compania ta bay cun’e. Tur dos compania tabata local. Pero a bay cu esun cu mas a cumpli cu e meta di atende cu e problema y tambe e medio ambiente cu tambe ta hopi importante. Esakinan tabata wordo kima den aire liber, cu tur e consecuencianan cu esaki por tabata tin cun’e.