PALU, Indonesia (AP) — E desesperacion a converti den rabia diamars den e localidad mas cercano di e epicentro di e fuerte temblor y tsunami cu a sacudi parti di e isla di Sulawesi cuater dia pasa. Mientras tanto, e habitantenan ta pidi yudansa na e presidente di Indonesia y e sobrevivientenan hambriento tabata bay te na e tiendanan pa haya cahanan di cuminda. E cifra oficial di fayecido a surpasa 1200 persona, cu cien tos di heridonan grave y ainda hopi tapa bou di e ruinanan.
P’aworaki, e parti mas grandi di atencion a concentra den e ciudad mas afecta, Palu, cu 380 mil habitante y cu a sufri dañonan considerabel. Donggala y otro areanan cercano a ricibi menos yudansa pa e mal estado di e camindanan y e caida di e liñanan di telefonico despues di e temblor di 7,5 registra diabierna den oranan laat di anochi, cual a genera un tsunami cu na cierto puntonan a yega 20 pia di haltura.
“Nos ta sintinos manera yiu nan adopta ya cu tur yudansa ta bayendo pa Palu”, segun Mohamad Taufik, un residente di e zona di Donggala di 38 años. El a sigui bisa cu cinco miembro di su famia ainda ta desapareci. “Tin hopi mucha chikito cu hamber, pero no tin lechi y pa esunnan cu ta malo, no tin remedi”.
E cantidad di victimanan mortal confirma a subi na 1234 persona, segun e vocero di e agencia di desastre, Sutopo Purwo Nugroho, den un conferencia di prensa na Yakarta. Den e comunidadnan di Sigui y Balaroa ainda tin hopi hende bou di ruinanan pa cual e cifra lo por aumenta.
“Cu tur e yudansa logistico cu ta yegando, e servicio na refugiado ta miho”, segun e vocero. “Nos mester di mas tempo ainda pa enfrenta tur e problemanan”.
Dialuna a dera 153 curpa den un fosa comun, agregando cu e operacion lo sigui diamars.
E deseperacion entre e victimanan cu tabata ricibi poco yudansa tabata visibel tur caminda. Na Palu, borchinan colga tur caminda bisando “Nos mester cuminda” y “nos mester yudansa” mientras muchanan tabata pidi limosna ariba caya y filanan largo di auto sperando riba combustibel.
E ekiponan di rescate tabata buscando sobreviviente pega bou di vivienda y edificionan destrui, incluyendo un hotel di ocho piso cu a bin abao, pero tabata tin mester di heavy equipment pa lanta e ruinanan.
Ta spera cu e cifra oficial di morto lo aumenta segun autoridadnan yega na e zonanan mas aisla. Ademas di Donggala, Sigi y Parigi Moutong , cu tin un poblacion combina di 1.2 miyon persona, no a wordo evalua completamente ainda.
Na december 2004, un teremoto grandi di 9,1 dilanti di Sumatra, west di Indonesia, a desencadena un tsunami cu a cobra e bida di 230 mil persona, entrenan miles di turista di varios pais.