Un total di 34 Bombero cu mas o menos 75 mucha cu ta sea yiu di Bombero y algun di scol Tra’i Merdia, a marcha hunto den un desfile masha colorido dilanti edificio di Conseho di Minister riba L.G. Smith Boulevard. E desfile aki ta pa den forma simbolico haci apertura di e “Siman di Prevencion di Candela” cu ta celebra pa di 39 aña consecutivo.
Den e desfile a participa 6 truck y un jeep di e Officier van Dienst di Brandweer. Entre nan tabatin auto di spuit, Hoogwerker, Materialenwagen, Dompelpompwagen y mas.
Banda di caminda tabatin un publico grandi, cu den su mayoria ta famia di e Bomberonan mes, specialmente pa mira e chikitonan cu a bisti nan T-shirt y nan helm di Brandweer cu masha orguyo. Dilanti Bestuurskantoor a nota presencia di e Comandante di Cuerpo di Bombero, hunto cu Minister Presidente y Minister di Husticia, bou unda Cuerpo di Bombero y Rescate Nacional ta resorta.
Internacionalmente ta observa e dia di Bombero dia 9 di October, den cual ta para un rato keto riba nan trabou di tur dia, cu den su mayoria ta salba bida di otro. Rond mundo ta considera e trabou di Bombero como uno di un heroe. Henter e siman aki lo tin diferente evento, pa celebra e Siman di Prevencion di Candela.
Cuerpo di Bombero Aruba ta existi desde aña 1976, como un departamento independiente. Prome cu esey e tabata parti di e trabounan di Polis. Awendia e ta conta cu 160 empleado, di cual 112 ta traha activamente cu combatimento di candela. E empleadonan ta parti den 3 diferente post, situa na San Nicolas, na Aeropuerto y na Tanki Flip. Pa aña nan ta responde na mas o menos 1600 melding, cu ta varia entre combatimento di candela, rescate, yudansa special y trabounan na aeropuerto.