Desesperacion ta pone Mike Eman manipula cu cifra atrobe

Ta un berguensa un biaha mas ora cu un lider corupto manera Mike Eman cu su partido berde no solamente berde di color sino berde di putricion, ta tilda Prome Minister di Aruba, di a gasta mas di 1 miyon na biahamento. Pero ta berguensa tambe cu e lider aki y su partido partido berde putri ainda ta kere cu nan por manipula e pueblo aki cu nan maldad di hunga cu cifra.

Esaki ta mustra con desespera Mike Eman y su partido berde putri ta pa yega na poder. Pero, ta conoci si cu durante 8 aña, hunga y manipula cifra ta loke cu mas AVP y Mike Eman a conoce, pa menciona un ehempel, nunca nan a entrega un presupuesto realistico of cu cifra corecto.

E pueblo aki na final di e gobernacion aki, lo por wak tur cifra preto riba blanco, di tur e gasto di biahe di Prome Minister y tambe nan ta mirando e logronan cu nos dama Prome Minister a alcansa den cada biahe unda el a representa pueblo dignamente. Algo cu nunca por a wordo bisa di e ex prome minister na unda ora cu e mester a haci e biahe mas importante di su temporada como prome minister, para den su sapato manera un homber, subi avion y bay Hulanda pa defende e pueblo aki, a scoge pa manera un raton sushi pa sinta yora bou mata, gaña muri hamber cu Insure den su man pa e pueblo aki haya lastima di dje y pa colmo despues di su welga a sali mas gordo cu e prome dia di welga.

Lastima e pueblo aki ta haya ora cifranan a mustra cuanto biaha Mike Eman a bay Hulanda hibando periodistanan mesun putri cu ne, hibando delegacionnan grandi cu ne pa nan sinta bay hole tulipan na Hulanda. Den dos aña e Mike Eman aki a biaha 17 biaha y e unico resultado cu el a obtene ta hinca Aruba mas y mas den e mega debe cu e costo haltismo di cada biahe. Biahenan cu ta worde considera mas bien biahenan di placer y di entrega di nos autonomia.

Mientras cu Prome Minister Evelyn Wever-Croes den 2 aña a biaha solamente 3 biaha cu un presupuesto hopi mas abou cu di Mike Eman, sin hiba delegacion cu ne. Anto logra confiansa bek pa nos pais. Algo cu Mike Eman ni a soña.

Pero un cos si Mike Eman por haci awo, e por biaha pa luna mes si e desea. Leu di e pueblo aki cu el a haci un daño enorme. Pasobra esun cu tey pa drecha e daño aki cu Mike Eman a haci contra nos pueblo, contra nos generacionnan cu ta bin despues di nos, ta Prome Minister Evelyn Wever-Croes. E Prome Minister actual cu ta traha pa e pueblo aki y cu ta determina pa saca e pueblo aki for di e disaster di Mike Eman y su partido di putricion.

Y un cos tambe ta sigur, y miho Mike Eman cuminsa kere, e pueblo aki, ya no ta kere den emanipulacion. E pueblo aki ta consciente di e realidad. Y manera e cantica ta bisa, Mike Eman bay gaña baca pasobra e pueblo aki ya no ta kere bo mas.

Comments

comments