JAJPUR, India – Un grupo di persona a rescata na India un baby recien naci cu a wordo haya dera bibo. Ta trata di e ultimo caso den e pais cu ta pone den relieve e problema di infanticidio femenino.
E baby, cu no tabata tin mas di seis ora di bida, a wordo bandona den un pos di tera poco profundo den un dump. Un persona a mira sanger y a duna e aviso di alerta.
E mucha muhe, haya den e ciudad di Jajpur, den e estado empobreci di Odisha, a wordo traslada pa hospital, unda e ta bao di observacion y ta for di peliger.
“E ta bon y tur su parametronan ta normal. E ta un baby den ful su termino, cu un peso di rond di 2.5 kilo,” Fanindra Kumar Paningrahi, hefe medico di e districto di Jajpur a bisa AFP. “Su lombrishi ta intacto y e curpa ainda ta cubri di vernix,” el a agrega. Personal di hospital a yama e mucha muhe Dharitri, un palabra sanscrit cu ta nifica “tera.”
Despues cu e por a bandona hospital, e lo wordo entrega na e comite estatal di bienestar infantil. Polis ta sospecha cu e recien naci a wordo bandona pa su mayornan debi na su genero of pasobra e mama lo ta un muhe soltero.
“Nos ta purbando pa rastrea e mayornan di e mucha, ta wordo trata como un caso di intento di asesinato, pasobra ta hopi cla cu nan tabata kier a mat’e,” oficial di polis, Jyoti Prakash Panda a bisa.
Na comienso di e luna aki, polis a recupera 19 feto femenino den un septic tank den e estado di Maharashtra y a acusa un dokter di a aborta nan ilegalmente pa mayornan desespera pa un mucha homber.
Dialuna, un feto femenino a wordo haya dera cerca di un septic tank na New Delhi despues cu a haya cachonan ta cobando e tera rond di dje.
India a prohibi e determinacion prenatal di e sexo, aunke e pruebanan ainda ta wordo pensa ta comun, vooral den e zonanan rural pober.
Fuente: http://www.infobae.com