Diaranzon dia 8 di mei 2019, den e Reunion General Anual di ABBA un mocion a ser presenta na unda a wordo proponi pa termina e confianza den e directiva di ABBA bou presidencia di sr. Karel Williams y alabes a pidi retiro per direct di tur esnan cu ta forma parti di dicho directiva e momento ey, cual mocion a ser acepta.
Den e mocion aki a ser dicidi cu un comision lo ser nombra y instala y ta wordo encarga pa e.o. inicia cu e campeonato den 3 siman, percura pa e cambionan den HR, busca un accountantskantoor pa revisa y scrutina e cuentanan anual di e ultimo añanan cu no a ser entrega y alabes yama un Reunion General Extraordinario pa eleccion di un directiva nobo y tur comisionnan, tur esaki den 90 dia.
Den un Reunion General Extraordinario cu lo ser tení pronto dicho comision lo ser nombra oficialmente y instala esakinan pa asina ey nan por cuminza cu nan tareanan cu por cierto lo no ta facil.
Apesar cu ya caba tin personanan cu a duna di conoce cu nan ta dispuesto pa forma parti di e comision aki tin e posibilidad pa teamnan bin cu hendenan cu nan ta kere cu lo por duna nan aporte. Esaki tambe pa crea un “zo breed mogelijke draagvlak” y por tin tur transparencia.
Despues di esaki ta e comision mes lo sigui informa prensa y fanaticada di deporte en general y di baseball en particular, resultado di nan trabou.
Adhunto ricibi copia di e mocion.
* cu desde juni 2018 e directiva actual no ta consisti di e cantidad minimo di 7 miembro y cu directiva no a hasi ningun empeño pa yena e vacaturanan aki;
* cu campeonato 2018 a conoce un retrazo enorme pa motibo di e “nalatigheid” di directiva pa no instala e diferente comisionnan. Esaki particularmente esun di protesta y esun di apelacion;
* cu no a notifica miembronan di e empeño pa haya e relato financiero di e tesorero. Esaki tin 3 aña. caba sin entrega un relato financiero;
Fuera cu esaki ta contra regla di Statuto y HR e ta contra tur regla comun di bon gobernacion.
* No ta cumpli cu palabracion cu e.o. subsidiecommissie;
Ainda no a entrega raport respecto e biahe pa Mexico na aug/sept 2018 ni tampoco di biahe pa Republica Dominicano, en todo caso miembronan no a ser notifica;
* Ta traha seleccion sin notifica of involvi teamnan. Den prensa ta haya sa cua ta e hungadornan ta den seleccion. Ta bai participa na torneonan SIN un preparacion debido y cu hungadornan cu a hunga poco wega cu nan propio ekipo;
* E “maneho” ta uno adhoc cu NO ta basa riba niun plan/strategia pa desaroya talento, opleiding, hisa nivel di baseball, no ta promove e deporte no tin un historia di e ultimo aña di baseball etc.
* cu desde e ultimo kwartaal di 2018 directiva tin den su poder un relato di 4 coachnan cu a bai Mexico na unda ilustra hopi inregularidadnan di ENTRE OTRO sr. Gregory Chirino. Y cu a tene esaki bon scondi. Ta te cu recientemente ora cu e mesun persona a bolbe hasi su mes culpabel na actonan inaceptabel cu e relato aki tambe a yega na conocemento di miembronan. Esaki por ser considera como “medeplichtigheid” di e directiva actual na un tipo di malversion.
ACTUANDO DEN FUNCCION Y BOU RESPONSABILIDAD
DI ABBA TA HACI CU DIRECTIVA HENTER DI ABBA TA KEDA RESPONSABEL.
ESAKI TA CONTRA REGLA COMUN DI BON GOBERNACION.
* CU TA BURLA DI AUTORIDAD DI ASAMBLEA ORA A ENTREGA UN RELATO SECRETARIAL DI UN NIVEL INACCEPTABEL. ESAKI TA CONTRA STATUTO Y HR Y REGLANAN COMUN DI BON GOBERNACION
TA DICIDI:
*1. Pa pone henter e directiva responsabel pa e actonan cu por ser considera como actonan cu ta contra bienestar di baseball en general y particularmente contra e bienestar di ABBA;
*2. Ta desaproba esakinan totalmente y ta termina e confianza den henter e directiva actual di ABBA, consistiendo di sr. Karel Williams (presidente), Sr. Gregory Milano (vice-presidente), sr. Rudolf Wester (secretario), R.Geerman( tesorero) y sr. Gregory Chirino y consequentemente pa medio di es mocion aki direktiva den su totalidad ta keda retira di inmediato;
*3. Pa di inmediato instui un comision temporario pa sigui cu e tareanan di directiva. En todo caso e comision aki mester *percura pa e campeonato inicia dentro di 3 siman, * trece e proposicionnan pa cambionan den e.o. HR, *percura pa haya e relato financiero y si ta necesario por medio di polis y hasi denuncia di e malversionnan eventualmente cometi y *trata na yega un entendimento cu
Fundacion di subsidio;
*4. E directiva saliente mester entrega dentro di 3 dia tur documentonan, derechonan di uzo di cuentanan digital manera email, website of otro medionan digital of no-digital y/o pertenencianan di ABBA na e comision ariba menciona;
alabes ta haci dentro di tres dia un debido traspaso -verificabel cu prueba-di tur palabracion, asuntonan pendiente of cualkier otro acuerdo cu tin actual cu cualkier otro partido;
*5. E comision aki tin como tarea special pa busca un “accountantskantoor” pa revisa miniciosamente e relatonan financiero pa di e manera ey e directiva nobo por hiba un maneho financiero corecto y sano, na unda tur instancia, tanto priva como publico, por tin confianza atrobe den ABBA pa asina ey e federacion por eherce su labornan na bienestar di baseball en general;
*6. E comision aki mester hasi e trabownan aki dentro di 90 dia y imediatamente despues di esaki yama un Reunion General Extraordinario pa eleccion di un directiva nobo y tur comisionnan; teniendo cuenta cu “termijnen” menciona den Statuut y HR pa eleccion di directiva (kandidaatstelling etc.).
*7. E comision mester tene e miembronan na altura di e avancenan di nan tareanan ynta pasa pa ordo di dia.