Ayera Stichting Rancho a haci entrega di un carta na gabinete di gobernador pa atende cu diferente preocupacion riba desaroyo den areanan patrimonio, dus areanan historico manera Waf’I Rancho, pero tambe otro areanan den Oranjestad. Tin areanan sumamente importante pa Aruba cu mester wordo protehi y conserva.
“Tin hopi cosnan cu nos ta mira cu no ta haya su atencion manera mester ta, anto esaki ta locual nos a hinca den e carta. Si nos papia di e problematica na Waf’I Rancho, nos a wordo yuda pa compila un carta na Hulandes cu a bay gobernador y lo sigui su pasonan pa tur instancia y departamento concerni cu tin di haber cu locual ta nos peticion,” segun sr. Clifford Rosa di Stichting Rancho.
E peticion ta pa para un rato e trabaonan den cercania di waf’I rancho pa asina por evalua kico ta poni riba papel, con nan a wordo documenta, y tambe riba e parti huridico wordo bon describi, mirando cu ta di acuerdo pa bin desaroyo y embeyecemento. “Pero manera nos a bay di acuerdo ta un otro trabao a wordo haci cu ta kibrando e parti di e patrimonio, pero tambe interpretacionnan ta wordo haci cu e carta nos a firma, tin cooperacion pa cosnan sigui tanten cu keda na afspraak cu mester pa asina ey tur hende ta den un ‘win-win situation’, segun sr. Rosa.
No ta di awo e fundacion ta pidiendo atencion pa e tema aki, pero a bin haya nan mes cu documentonan cu ta mustra cambio den number di parcela, tin cambionan di afspraak tambe.
Ora cu DIP y DOW a duna traspaso di tereno na APA, tin specificamente skirbi eyden pa garantisa acceso di piscado na e pier y rond di dje. Pero tambe mester compronde cu e comunidad mester por tin acceso pa cumpra pisca. “Cosnan asina ey ta wordo bari for di mesa, mirando cu no tabata comprension pa cultura di Aruba, e cultura di rancho, cual ta e cultura di piscado, y tur esaki ta loke nos mester a pasa lunanan largo di debate, sinta na mesa, cu reunion y tur esey. Y te ainda nos ta mira cu e bon boluntad cu nos tin pa desaroyo di e area aki, tog otro cosnan ta wordo haci, anto esey nos no ta haya cu ta bon,” segun sr. Rosa.
E ta sigui splica cu un bon bisiña bo mester semper tin e bon, tur inversionista cu yega Aruba ta bin cu bon intencion pero si mira e comportacion aworaki pa loke ta e piscado, y e futuro di loke ta bay tin den e areanan aki di waf’I rancho, ta algo cu casi bo por bisa cu nos ultimo pida di nos patrimonio ta bayendo perdi. “Como fundacion rancho, nos tin esakinan ancra tambe den nos statutonan y locual nos tin poni den nos statutonan nos ta para p’e,” sr. Rosa ta expresa. “Si bo sistema no ta funciona, lamentablemente bo tin cierto pasonan pa tuma y mi ta kere nos a yega na e momento pa tuma otro pasonan pa e atencion wordo garantisa y atendi cu ne, y ban wak cu nos por proteha locual ta nos patrimonio,” segun sr. Rosa.