Willemstad – For di sifra ku Ofisina Sentral di Statistik (CBS) a publiká awe, ta indiká ku e nivel di preis promedio a subi na luna di desèmber 2022 ku 0,6 porshento, kompará ku luna di novèmber 2022. E sifra di inflashon a subi te na 7,4 porshento na luna di desèmber 2022.
Desaroyo di preis luna di desèmber 2022 kompará ku luna di novèmber 2022
Na luna di desèmber 2022 e sifra índise di preis pa konsumidó (CPI, “Consumer Price Index”) di Kòrsou a subi ku 0,6 porshento, kompará ku luna di novèmber 2022, esta el a desaroyá di 116,9 na novèmber 2022 pa 117,6 na desèmber 2022. Den desèmber 2022 mayoria kategoria di konsumo a subi di preis ku eksepshon di e kategoria di konsumo di bibienda (-2,5%). E kambio den preis mas signikativo den luna di desèmber 2022 ta e oumento di preis di produktonan alimentisio (0,9%), rekreashon i desaroyo (1,6%), muebel i aparatonan doméstiko (1,5%), i transporte i komunikashon (3,3%) di kual e preis di gasolin tambe a subi (0,2%). Loke a bira mas barata den e kategoria di konsumo ta bibienda (-2,5%), di kual elektrisidat (-9,9%), awa (-4,6%) i kerosin (-6,0%).
Desaroyo di preis luna di desèmber 2022 kompará ku luna di desèmber 2021
E sifra índise di preis pa konsumidó (CPI) di desèmber (117,6) ta 8,3 porshento mas haltu ku e CPI di desèmber 2021 (108,5). E sifranan aki ta indiká ku e mantenshon di kosto di bida pa konsumidó durante luna di novèmber 2022 ta 8,3% mas haltu kompará ku e mes un luna na aña 2021. E kategorianan ku a kontribuí mas tantu na e subida aki ta kuminda (15,2%), muebel i aparatonan doméstiko (12,6%), transporte i komunikashon (11,2%), i bibida i produktonan di tabako (10,9%).
Desaroyo di preis riba término largu: inflashon desèmber 2022 Inflashon ta reflehá pèrdida di balor di sèn, pues di forsa di kompra, dor di subida di preis di produkto i servisio pa e konsumidó riba término largu (usualmente 12 luna). E sifra di inflashon pues ta duna un indikashon di e subida promedio di kosto di bida, i p’esei ta ser rekomendá komo instrumento pa indeksashon di salario, penshun, ònderstant/ benefisio sosial, suèldu mínimo i otro entrada.
Inflashon den un sierto luna ta ser kalkulá dor di komparashon di e CPI promedio di 12 luna den e luna konserní ku e CPI promedio di 12 luna den mes luna e aña anterior. Si kompará e periodo di e último 12 luna te ku desèmber 2022, ku mes periodo un aña anterior, ta resultá ku preisnan na averahe a subi ku 7,4 porshento: e CPI promedio di 12 luna a desaroyá di 106,0 na desèmber 2021 pa 113,8 na desèmber 2022.
Pa mas informashon por konsultá e wèpsait di CBS, www.cbs.cw/infationprices
