Mientras cu proyectonan similar ya ta operando exitosamente den Caribe, desaroyadornan di un eco-resort na Isla di Oro ta sigui avansa diligentemente pa Aruba no keda atras den e mercado emergente aki. No solamente ta trahando pa cumpli cu tur rekisito legal di Pais Aruba, pero tambe sigui e recomendacionnan haci pa tur NGO ambiental local. E estudio di ‘Environmental Impact Assesment’ ta cla y den transcurso di siman a presenta su resultado na varios instancia publico y priva. Adicionalmente, desaroyadornan ta desea di expresa nan sosten total pa cu e iniciativa di inclui e area di Isla di Oro entre e 16 zonanan natural proteha cu a keda proponi na Parlamento di Aruba.
“For di prome instante nos a demostra un boluntad sincero pa traha cu tur sector di Aruba y na beneficio di su pueblo y industria turistico y esey no a cambia,” asina Franz Sydow, representante di e grupo desaroyador di Zoetry Isla di Oro Resort a duna di conoce. “Nos ta e promenan cu ta apoya e idea pa e area di Isla di Oro cay bou di un structura legal di proteccion. Esey ta cuadra cu nos pensamento y pa cual nos a bin ta prepara.”
Den estudionan haci, desaroyadornan a identifica e multiple reto cu e ecosistema na Isla di Oro ta afronta. Pesey ta boga pa ehecuta lo mas pronto posibel programanan di limpieza riba tera y mey mey di mangelnan, restauracion di coral y control responsabel di sangura, entre otro accionnan. Desaroyadornan tin plannan ya elabora pa yuda rescata y resguarda y preserva henter e zona.
Den transcurso di siman pasa e desaroyadornan di Zoetry Isla di Oro Resort a sostene encuentronan cu Parlamento di Aruba, Aruba Trade & Industry Association (ATIA) y instancianan ambiental di e isla, pa presenta e conclusionnan di e EIA elabora pa e prestigioso compania Langan International. E documento di mas 300 pagina a haya elogio di mas di un persona, incluyendo defensornan ambiental, indicando cu nunca a yega di mira un rapport asina extenso y specifico.
Na tur instante, tabatin oportunidad pa haci pregunta directo na Chip Day, Senior Environmental Project Manager. Na final di cada ocasion, e reaccion di e audiencia tabata uno positivo basa riba e manera serio, amplio y detaya con ta anda cu e proyecto. Aki, un biaha mas, e desaroyadornan a reitera nan compromiso di ehecuta un proyecto cu ta 100% eco amigabel y cu den ningun forma ta afecta e flora y/of fauna di e luga. Al contrario, kier trece un dimension adicional na e vision di sostenibilidad cu Aruba ta carga como bandera na mundo henter.
Otro isla y destinonan den Caribe ya a tuma e paso y a establece nan presencia den e segmento di eco turismo. Sandals a habri un resort igual na e concepto di Isla di Oro, na Jamaica na fin di 2016 y ta trahando riba un di dos riba e isla di St. Lucia cu ta cla pa ricibi su prome huespednan na Mei proximo. Mexico tambe tin compleho di bungalows riba awa cu El Dorado Maroma cerca di Cancun y hopi otro mas operando caba of bou construccion na Belize, Turks & Caicos, Cuba y te hasta Disney ta drenta e wega cu un compleho den un lagoon di Orlando.
Desaroyadornan di e eco resort Zoetry Isla di Oro keto bay ta sigui extende nan invitacion na organisacion y individuonan critico di e proyecto, pa sinta y intercambia informacion pa asina por forma un opinion mas informa y obhetivo di e proyecto. Ta dispuesto pa traha hunto na beneficio di Aruba su naturalesa, sin cu esaki ta kita oportunidad pa Aruba y, en special, e pueblo di Pos Chikito y Savaneta tambe por conoce un progreso socioeconomico.
Den e multiple reunionnan sosteni cu Gobierno, NGO’s, semper a solicita nan opinion y recomendacionnan. Desaroyadornan ta invita cualkier NGO pa colabora den e estudio ambiental mas grandi y extenso cu a yega di haci den e area. Esaki ta un oportunidad unico pa traha hunto den ekipo y haci di Aruba, y en special, e area di Pos Chikito, un ehempel pa sigui rond den Caribe caminda comunidad, Gobierno, sector priva a bini hunto pa crea un desaroyo ecologico, comunal y economico.