Cu un sonrisa grandi riba su cara Derrel Lampe a brasa amigo y familiarnan cu a bay ricibi’e na aeropuerto diaranson atardi.
Derrel Lampe a participa den competencia di Mister Supra National 2021 y a keda den e top 20 di e participantenan. “Mi curason a dal para un rato na momento cu a menciona e nomber di Aruba como prome den e 20 clasificadonan,” Derrel Lampe a bisa na su yegada.
El a bisa cu e logro aki ta hopi gandi y a habri hopi oportunidad p’e tambe. Pero cu awor e kier pasa poco tempo cu su famia prome cu e tuma un decision cu e ta bay haci den futuro.
Mister Supranational 2021 tabata e di cinco edicion di Mister Supranational. El a wordo organisa dia 22 di augustus, 2021 na Nowy Sącz, Polonia.
Nate Crnkovich di Merca a corona Varo Vargas di Peru como su sucesor na final di e evento. Esaki ta prome biaha cu Peru ta gana e certamen di Mister Supranational, e di dos pais di Sur America y e di tres di Latino America pa gana esaki.
