Dia 20 di november ta Dia Internacional di Derecho di Mucha. E dia aki ta corda cu e muchanan tin nan derecho. En total ta 54 articulo y e tratado aki a wordo firma dia 20 di november 1989. Aruba a forma parti di esaki, un poco mas despues. Sra. Jeanmiree van der Werf, Preventie Medewerkster na Fundacion Respetami.
Fundacion Respetami no ta haciendo niun actividad grandi di nan mes pa cu e fecha aki. Pero si nan ta focus, door di pone hopi enfasis ariba articulo 19, pero tambe tin articulo 34, cu ta papia di proteccion di menor, abuso sexual, negligencia y maltrato, explotacion sexual di e mucha. Abusonan sexual ta tuma luga hopi den seno familiar. Si e ta un mucha cu ta ariba caya, e ta abuso sexual ta tuma luga na man di un malhechor. Ora ta papia di explotacion y abuso sexual di mucha, ta pensa den direccion di explotacion comercial di mucha, pornografia.
Fundacion Respetami ta focus hopi ariba articulo 18 y 34, pero tin otro articulo cu tambe ta importante. Ta importante pa e mucha tin acceso na informacion, ya cu esaki ta bon pa desaroyo y su bienestar. Ora ta trata di informacion tocante nan desaroyo sexual, ta importante pa e mucha tin informacion tocante esaki. Hopi biaha esaki ta spanta mayornan y educadornan, cu ta spanta ora nan yiu ta haya informacion tocante sex. Pero ta bon pa e mucha tin e informacion aki, ya cu e ta proteha e mucha di bay busca informacion na e caminda robes. Si e mucha skucha di adultonan cu e ta confia, di kico ta kico tocante sex, mas chikito mas miho, e no mester bay camindanan robes, pa busca e informacion. Un mucha ta curioso di naturalesa.
Awendia un mucha tin acceso na tecnologia, por medio di telefon, tablets, etc. No por prohibi e mucha di subi internet. Si ta bon pa pone limite pa e mucha. Mayornan di awendia, hopi di nan ta hoben, y nan tampoco no tabata tin acceso na informacion ariba internet manera awendia. Pa cu esaki, a duna charla tocante sexting na scolnan. Kisas otro aña nan lo duan charla tocante esaki na mayornan. Esaki ta algo cu ta existi pa hopi tempo na Aruba, pero awendia e ta algo cu ta bin dilanti hopi mas. Un charla tocante esaki ta bon pa mayornan pa nan tin miho bista y pa tin miho conocemento ariba e tema aki, segun Sra. Jeanmiree van der Werf, Preventie Medewerkster na Fundacion Respetami.