Derechonan di mucha y bienestar di hobenan na Aruba mester keda topiconan di
atencion, segun Sra. Arends-Reyes. Recientemente tawata dia internacional di derechonan di mucha y ta un bon oportunidad pa para keto un rato y refleha ariba con leu Aruba a yega cu cumplimento di e derechonan di mucha. Dia 6 di Februari 1995, Reino Hulandes a ratifica e tratado internacional aki. Durante gobernacion di AVP a pone hopi mas enfasis ariba e bienestar di nos muchanan y hobenan den reino y e ta un tema cu lo keda halto ariba agenda. Proyectonan manera Traimerdia pa skolnan basico y Nos Atardi pa skolnan secundario. Ley di Crèche cu falta implementacion y un inspector encarga cu esaki. Tambe AVP a pidi pa sondea por ehempel posibilidad pa wak ki espacio lo tin pa un deducion fiscal pa doñonan di trabou cu ta contribui cu e pago di crèche. Ley di Enseñansa Obligatorio cu por cierto ta un ley cu mester wordo reenforsa y adapta cu cualificacion inicial (startkwalificatie) manera cu Sra Arends-Reyes semper a boga pe. Tambe proyectonan manera ‘Dreamers’ mester conose continuacion. Sra Arends-Reyes ta spera cu e bienestar di muchanan y hobenan tambe keda halto ariba e agenda di e gobierno nobo. Durante campaña a tende hopi promesa y ta spera cu nan materialisa tambe. Segun e partidonan cu awe ta forma gobierno skol mester ta completamente gratis, airco tambe. Skolnan lo mester por keda habri pa ofrece actividadnan extra curricular y a bisa publicamente cu nan pensamento lo ta pa aumenta e bbo pa yega na esaki siendo cu gobierno di AVP tawatin diferente otro forma pa logra esaki sin cu lo mester aumenta impuesto. Ta di remarca cu e gobierno nobo no a opta pa un Ministerio specificamente cu ta encarga cu Hubentud siendo cu internacionalmente di parti Nacionan Uni tin derechonan di hobenan y na Hulanda e ta un tema cu hobenan a hanja legislacion y cambionan grandi den nan beneficio y pa nan bienestar. Sra Arends-Reyes mes den e Parlamento anterior a presenta diferente mocion cu a conta cu sosten unanime tanto na beneficio di muchanan, hobenan y hobenan profesional y ta laga sa di continua cu e enfoke aki.