LONDON, Inglatera- E hoben tenista Aleman, Alexander Zverev diadomingo a titula campeon di e ATP World Tour Finals ora cu el a gana e Serbio Novak Djokovic den e O2 Arena di London.
Pa Zverev, cu su 21 aña a logra derota su rival, e nr. 1 den e deporte di tenis, cu score 6-4 y 6-3 cu ademas ta 10 aña mas grandi cu e tenista Aleman, esaki ta e “titulo mas importante” di su carera.
Durante e ceremonia di entrega di trofeo, e ganado a afirma, den forma di joke “Danki Novak pa lagami gana”, segun Marca, citando e tenista Aleman. Di otro banda, e rival veterano a remarca: “Bo tin solamente 21 aña, pero bo a gana hopi caba y bo tin un futuro bo dilanti”.
Esaki ta e di cuater titulo di e temporada aki pa Zverev, cu ya caba a tabata tin victorianan importante den ATP na Washington (Merca) y Munich (Alemania) y tambe e Masters 1000 di Madrid (Spaña).
E ATP World Tour Final ta wordo disputa anualmente na final di e temporada pa e ocho tenistanan miho clasifica ariba e ‘ranking’ mundial.