Despues cu dialuna merdia un reunion a tuma luga pa e Departamentonan di Imigracion y Douane pa loke ta e ferry, a papia cu Director di Directie Scheepvaart, Carlyle de Coteau, kende a splica kico a sali afo for di e reunion aki.
De Coteau a splica cu e grupo en cuestion aki tin intension di cuminsa opera na fin di October. E ta haya un tiki tribi di nan parti cu nan ta bay cuminsa opera na October, pasobra nan no sa si Aruba ta cla pa ricibi nan. A sinta y Imigracion y Douane, a confirma na mesa na APA cu nan no ta cla pa ricibi ningun ferry na October of na November, of na December of na Januari otro aña. E ta full un organisacion, full un planning, full un preparacion pa ricibi un ferry cu sigur uno cu kier bin opera seis biaha pa siman y cu capacidad di 600 persona pa trip. Bisando esey no solamente cu e parti di e posibel grupo di pasahero di Venezuela cu ta bin Aruba, pero tambe obviamente si tin pasashi di 70$, lo bay tin hopi Arubiano cu tambe kier bay haci e trip pa Venezuela y tambe nan mester por controla e fluho di pasahero como esun cu ta bin, como esun cu ta bay. Nan ta bisa cu nan no ta cla pa esey. E ora a palabra cu APA lo duna e agente di conoce, cu Aruba no ta cla pa ricibi e ferry aki.
Pa por duna servicio na un ferry ta full otro compara cu un crucero.
Tin palabracion for di mundo di crucero y tin otro palabracion den e caso di ferry, etc. Si ta bin den e mesun acuerdonan cu ferry, pero nunca esaki a bin al caso. No a sinta cu e gruponan pa papia of haya sa e intencion con nan kier haci’e of bin na palabracion.
No ta wak cu esaki lo cuminsa pa October, manera e grupo ta pretende pa e cuminsa opera, segun de Coteau.
E grupo tin un representante riba e isla, cual ta un agencia. Ora cu APA a informa e agencia cu nan ta bay yama pa un reunion, preferiblemente a sinta cu tur hende na mesa y a wak kico nan plannan ta, wak con por yuda nan y despues cu ta sinta cu nan, ta informa minister y e ta pa minister bay busca un decision na ministerraad.
Ta difente ministerio esaki ta toca, entre nan ministerio di transporte. Mas tanto e minister di economia, minister di husticia y minister di finansas, ta envolvi. Mas cu claro mester di un decision di e ministernan en conhunto. Ta bay tin inversionnan cu tin cu tuma luga y tambe gastonan, y aki ta ministerraad so por tuma e decision ey, segun de Coteau.