Charlaine Leslie, kende ta dietista/nutricionista a duna un charla interesante recientemente durante e Feria di Salud di Hyatt Regency. E hotel a organisa nan Dia di Salud pa conscientisa nan mas di 600 empleado di kico cada un por haci pa nan mes y nan famia pa por disfruta di un bida mas saludabel. Ademas organisacionnan cu ta ofrece informacion di nutricion y cuido general di salud, Hyatt a invita diferente compania cu ta haci tratamento di relahamento y beyesa pa demostra nan servicio y productonan.
Leslie a splica cu den cuadro di Dia Mundial di Curason, cu ta conmemora riba diahuebs proximo, el a inclui informacion tocante cuido di curason y prevencion di enfermedadnan cardiovascular den su presentacion. El a subraya cu enfermedadnan cardiovascular ta un problema cu por tin consecuencianan hopi grandi. Sobrepeso, obesidad, presion halto, colesterol halto y no haci suficiente actividad fisico, ta factornan di risico pa enfermedadnan di curason. E enfermedadnan no tin mucho sintoma y pues control di salud ta necesario den e proceso di prevencion di enfermedadnan manera di curason.
Charlaine Leslie y colega Iraida Thijsen hefe di Seccion di Salud na IBiSA a keda hopi contento cu e oportunidad cu Hyatt a brinda nan pa bin comparti un momento cu e empleadonan y motiva nan pa cuida nan mes miho y haci nan chekeonan.
DESPA y IBiSA tambe tabata encarga cu e servicio di haci “Health check”, cual ta encera pisamento, midimento di presion y midimento di BMI, entre otro. Iraida Thijsen di e seccion Salud di IBISA tabata encarga cu e coordinacion di controlnan aki. A presenta tambe diferente foyeto di bon nutricion y alimentacion, actividad fisico, etc. cu informacion na e empleadonan.
DESPA ta forma parti di e Plataforma Promocion di Salud, cual ta consisti di Hospital, AZV, SVb, IBISA, IMSan, Docter di Cas y Wit Gele Kruis. Iraida Thijsen a bisa cu nan ta desea pa otro organisacionnan tambe organisa eventonan asina pa yuda nan empleadonan enfoca riba nan salud.