Departamento di Salud Publico conhuntamente cu e Team di Calamidad di Aruba ta informa lo siguiente

Manera conoci caba siman pasa Dr. Horacio Oduber Hospital a haye confronta cu un situacion di un atake cibernetico.

Ayera nochi dia 27 di november Minister Presidente interino a splica e motibo pakico a activa e Team di Calamidad.
Pa es motibo aki nos di Departamento di Salud Publico kier informa comunidad di e desaroyonan di e ultimo 24 oranan.

Tin bon comunicacion entre Dr. Horacio Oduber Hospital y e Team di Calamidad y por reafirma cu e situacion di IT na Dr. Horacio Oduber Hospital ta controla. Cada dia tin adelantonan grandi den e parti di IT pero ainda falta pa restaura e netwerk.

Pa es motibo aki ta pidi comprension di parti di usuarionan di Hospital pa si e caso no ta hopi urgente, pa preferiblemente bai dokter di cas pa evita cu mester warda hopi na Departamento di Emergencia.

Alaves e Team di Calamidad kier a recomenda tur instancianan pa revisa nan sistema regularmente y si tin mester di un “up-date” pa haci esaki mesora y asina proteha nan seguridad cibernetico.

Lo keda mantene comunidad di Aruba na altura di cualkier evento relaciona cu e topico aki regularmente pa evita cualkier inconveniencia.

Comments

comments