Directora di Directie Natuur en Milieu (DNM), Sra. Jahaira Jansen – Geerman a indica cu actualmente ta bezig ta monitor e situacion di e mangelnan den saliña na Savaneta. Na Juli 2017 a haya keho/ remarca cu a drenta cu e mangelnan den saliña na Savaneta ta muriendo. Consecuentemente DNM subsecuentemente a midi e calidad di awa cual tabata malo, e cantidad di salo den e awa tabata mucho mas cu e mester tabata. Segun Sra. Jansen – Geerman manera cu a constata e situacion, a cuminsa remedia e situacion.
E tipo di mangel cu tin na e sitio aki ta biba cu nivel di 35 di salinidad, sinembargo a constata cu e awa tabata na 70 di salinidad cual ta indica cu e nivel di salinidad tabata mucho halto. “Literatura ta bisa cu un nivel di salinidad di 60 ya ta mortal pa e matanan aki.
Locual cu a constata tambe ta cu e nivel halto di salinidad ta consecuencia di no tin suficiente fluho di awa. DOW hunto cu WEB a cuminsa trata na mehora e fluho di awa y eventualmente a resulta cu e salinidad a baha. E situacion y calidad di awa na e parti mas pariba di e saliña a bira 40 cual ta indica cu ta bayendo den un bon direccion. E parti mas pabou si ta na 60 ainda cual ta basta halto. “E parti ey di e saliña falta mas tempo, sinembargo si e salinidad no baha, e ora mester wak pa algo otro wordo haci pa drecha e situacion di e parti di e saliña ey tambe.”
Importancia di mangelnan
Mangelnan ta importante pa nos medio ambiente como cu nan ta hogar pa diferente parha y pisca pero tambe pasobra nan ta proteha nos costanan contra laman bruto y ora cu tin horcan, contra perdida di tera ‘erosion’. Tambe e mangelnan ta importante pasobra ora cu awa yobe e mangelnan ta ‘vang op’ e awa y locual cu esaki ta laba pa e ora no tur e sushi ta bay lama cual ta proteha nos coralnan tambe, Sra. Jansen – Geerman a splica
Pa loke ta e recuperacion di e mangelnan mes, no por bisa mucho di e condicion, pero ta bezig cu investigacion unda cu ta keda monitor e matanan, conta blachi y controla cambio di color di e blachinan. Esaki lo wordo haci pa e proximo 12 lunanan pa di e forma aki por tin informacion concreto di desaroyo di e mangelnan.