Esaki ta di cinco biaha cu DAO ta realisa e investigacion di Encuesta di Forsa Laboral aki riba peticion di Minister di Asuntonan Social, Asuntonan di Hubentud y Labor. DAO den cooperacion cu Oficina Central di Estadistica (CBS) a realisa e investigacion di Mercado Laboral aki. EFL ta un encuesta di muestra (steekproef onderzoek) bou di hogarnan na Aruba cu e meta pa midi e ultimo desaroyonan riba Mercado Laboral.
Indicadornan importante cu ta wordo midi door di e investigacion EFL ta: e cifra di desempleo; e grandura y desaroyo di e poblacion laboral; e grandura y desaroyo di e grupo cu ta buscando trabou y e grado di participacion.
EFL 2015 tabata un exito grandi bou di e poblacion unda cu tambe a recoge otro datonan di mercado laboral.
Tur esaki a tuma luga den e periodo 31 di October 2015 te cu 27 di November 2015. E publicacion di e indicadornan principal di resultadonan di EFL 2015 a sufri un retraso debi na diferente circumstancianan imprevisto. DAO ta hopi gradicido na tur e hogar, encuestador- y instancianan cu a duna nan contribucion pa exito di e investigacion di Mercado Laboral aki.
Prome resultadonan di e Encuesta di Forsa Laboral 2015
Siguientemente ta sigui algun di e resultadonan mas importante di EFL 2015. E resultadonan ta wordo compara cu e resultadonan di EFL 2014.
E cifra di desempleo a conoce un caida leve di 7.5 porciento den aña 2014 pa 7.3 porciento den aña 2015. Aña 2015 a carectirisa su mes door di un crecemento economico chikito, tambe bou di sector di turismo (bou di esaki ta cay e sectornan di mas grandi di e mercado laboral Arubano manera Hotels and Restaurants, Groot- en kleinhandel y Onroerend goed, Verhuur en Zakelijke dienstverlening). Ta trata di sectornan cu ta wordo fuertemente influencia door di turismo.
Compara cu otro paisnan den nos region manera Curaçao (11.7 % oct 2015), St. Maarten 9.2 % 2013, Barbados (11.9 % Jun 2015), Jamaica (13.3 % Dec 2015) y Bahamas (14.8 % Nov 2015). Aruba (7.3 %) hunto cu paisnan manera entre otro Trinidad y Tobago (3.5 % Dec 2015) y Bermuda (6,6% Aug 2015) ta entre e paisnan cu e cifra di desempleo mas abou.
Ora midi desempleo a base di genero ta demostra cu e cifra di desempleo masculino pa aña 2015 a baha di 8,5% pa 7,0%, mientras cu e cifra di desempleo femenino a aumenta di 6,4% pa 7,6%. E cifra di desempleo a baha pa tres aña consecutivo
E cantidad di persona trahando a crece desde aña 2010. Entre 2014 en 2015 tin un disminucion. E cantidad di trahadonan compara cu aña 2014 a baha cu 1565 persona. Un disminucion di 2.9 prociento. E cantidad di persona trahando ta 51250 persona.
E poblacion laboral activo tin un total di 55576 persona y a disminui cu 1783 persona y na November 2015 esaki tabata 55576 persona.
E caida aki ta principalmente causa door di un caida den e cantidad di esnan trahando y esnan desemplea.
E grado di participacion den aña 2015 a baha cu 3.2 punto porcentual compara cu aña 2014. E grado di participacion tabata 62.4 na aña 2015. Esaki tin di haber cu e hecho cu e poblacion laboral potencial (esnan di 15 aña bay ariba) a subi compara cu e poblacion laboral.
E cifra di esnan inactivo a subi cu 3516 persona den aña 2015, en comparacion cu aña 2014. Esaki ta un aumento di 11.7 porciento. E cantidad di esnan inactivo ta 33,552. E cifra aki ta consisti principalmente di pensionadonan y esnan cu ta bay scol.