Kico ta e rol di Departamento di Labor ora tin un conflicto laboral y e por tuma accion contra un doño di trabou. Abogado mr. Hose Figaroa ta splica.
Si ta caso di un conflicto na pia di trabao, su rol ta di Mediador. Den caso, cu p.e. ta bay pa retiro di trabao, e tin autoridad pa bisa si of no. un hende por wordo kita, unda cu e mester cumpli cu cierto rekisitonan legal, manera p.e. uzo di Uitzendbureaunan.
Den caso aki, e tin autoridad, y e por impone un sancion ariba e compania, pero pa loke ta conflicto di trabao, den simpel caso, e rol ta Mediador entre dunado y trahado.
Mr. Hose Figaroa a sigui splica cu un gran parti di e problema ta sinta, cu e trahado no ta totalmente na altura di su derechonan. Si compara nos leynan laboral na Aruba, cu otro paisnan, ta un hecho cu e proteccion pa e trahado ta hopi mas grandi. Sigur internacionalmente. Pero tanto bal e trahado tin proteccion, pero e no ta na altura kico ta su derechonan.
Ta tarea sigur di sindicatonan, cu ta un tarea importante, pa conscientisa trahado pa kico ta su derechonan. Departamento di Labor tambe tin un rol pa hunga cun’e, pa conscientisa e trahado di su derechonan. Na momento cu un trahado sa cu e dunado di trabao, no ta cumpliendo cu ley, e ora e por haci algo. Pero si e trahado no sa cu loke e dunado di trabao ta haci, ta contra ley of no, e ora dificilmente e trahado por haci algo.
E leynan ariba su mes, no ta malo. E trahado aki na Aruba ta bon proteha, pero e trahado mes no sa, cuanto proteccion e tin, cuanto derecho e tin na pia di trabao, pa cual e no ta challenge e dunado di trabao.
Abogado mr. Figaroa a sigui bisa, cu si e trahadornan sa nan ley laboral sigur e trahado sa unda e ta para pa ley y no ta pasa den procesonan dificil laboral. Un cos cu ta hopi dilanti, via sindicato, ta e hecho cu e trahadonan hopi biaha no ta para pa nan derecho, no door cu nan no kier pero hopi biaha door di no sa kico ta nan derecho.
Si tin un sindicato na pia di trabao, esey ta tarea e ora di sindicato. Den caso di FTA esey ta sigur tin plannan basta extenso, pa bay aumenta loke ta e conscientisacion di e trahado, pero banda di esey, instancianan manera p.e. Departamento di Labor, lo ta un bon tarea tambe pa conscientisa e trahado mas, di kico ta su derecho, di kico por y di kico no por. E trahado no solamente tin derecho, pero obligacion tambe.
Ironicamente, hopi biaha ta haya un conflicto entre dos persona cu no sa leynan di Aruba. Bo tin un dunado di trabao cu no ta na altura di kico ta e derecho di e trahado y e trahado cu no sa su derechonan. Pa e dunado di trabao, pero tambe pa e trahado, conocemento di nan derechonan ta hopi importante, si bo no tin conocemento, bo no sa kico por of kico no por, segun mr. Hose Figaroa.