Algun luna pasa director di Departamento di Labor, Franklin Kock, a anticipa cu por a bini yen di conflicto laboral na caminda, awe algun luna despues a sinta cu sr. Kock pa mira kico ta e situacion actual mirando cu mediador di gobierno mes a indica cu cos ta bayendo for di man. Segun sr. Kock, nos a wordo confronta cu un pandemia cu a afecta nos economia grandemente na unda cu hopi negoshi a haya nan mes den problema serio. “Gran parti di negoshi awor ta existi door cu nan ta hayando diferente ayudo di gobierno, dus eigenlijk nan ta operando den un forma fictisio,” segun sr. Kock.
E director ta sigui splica cu tin mas o menos 20 mil trahado cu ta riba Loonsubsidie, y na momentonan aki e preguntanan cardinal ta: con hopi e pandemia lo dura? Con hopi e subsidio lo bay dura? Y por ultimo,si e subsidio dura mes, con hopi e negoshinan cu ta hayando subsidio lo bay sigui sobrevivi tog?
“Pasobra nos no mag lubida, gobierno ta yuda pa sueldo di trahadonan, tin cierto negoshi ta haya pa gasto operacional pero e no ta completo, abo como dunado di trabao mester keda duna placa acerca pa e luga keda draai y hende keda cerca bo, con hopi un negoshi lo por want’e?”, sr. Kock ta expresa.
Nos tin tambe negoshi cu no a pidi Loonsubsidie, of cu tabata tin e anto a stop, y ta gewoon draai anto tin hasta cu ta pagando 100% of a yega na areglonan los di Loonsubsidie cu nan trahadonan pagando un tiki menos cu tambe ta draai. E pandemia aki, y con el a afecta economia mundialmente a afecta tur negoshi. “Si bo ta riba Loonsubsidie of no, pa nan tambe, con hopi nan lo por sigui draai?,” segun sr. Kock.
Dus si bay riba e datos cu tin aworaki, kedando riba e parti di Loonsubsidie, figura bo cierto momento e Loonsubsidie stop, negoshinan ta haya nan mes cu cierto problema, trahadonan ta wordo kita, of negoshi ta baha cantidad di trahado, bo por yega e ora na un desempleo entre 40% cu 50% cual ta loke Departamento di Labor ta calculando. “Ta cosnan cu por pasa rapido, nos cu ta mira e mercado laboral, nos ta preocupa y nos sa cu e ta preocupa e dunador di trabao y trahadornan, pasobra tur ta den incertidumbre riba con hopi nan lo want’e,” segun sr. Kock.
Tur esey ta intrankilidad cu ta trece tension den compania, y awor tin mas tension den diferente compania cu lo por tin normalmente si no tabata tin e pandemia, anto esey ta conduci na mas chens di conflicto. “Pa nos ta hopi importante como Departamento di Labor, pa nos mustra cu nos tin e derecho di existencia pa yuda e mercado, pa nos tin un departamento di Conflicto cu ta disponibel ki ora cu ta pa yuda trahado, awor nos mester t’ey pa yuda trahado y si por tambe e dunado di trabao si mester di asistencia,” sr. Kock ta bisa.
Hasta durante e temponan aki, e pensamento di e departamento ta pa purba na yuda si tin conflicto laboral, pa purba soluciona cualkier problema pa e trahado keda mas tanto cu ta posibel na trabao. Pero asina mes e no ta facil mirando e situacion cu nos ta aden. Den siguiente publicacionnan, Masnoticia lo sigui na cubri e diferente temanan tambe cu a bini dilanti na Departamento di Labor como tambe nan departamento di Conflicto y con ta tratando cu esaki durante ultimo tempo.