E formulario di Inkomstenbelasting di 2015, recientemente departamento di Impuesto a otorga e formulario ey. Dia 1 di December cu a pasa tabata e deadline di acuerdo cu e termino legal, esta e dos lunanan cu ley ta duna. Pero tambe ta hayando awor aki hopi cliente cu no a entrega y si nan ta haya boet. Si nan no a entrega nan formulario ainda, nan no ta bay haya boet. Departamento di Impuesto a dicidi di duna un prolongacion di termino caminda cu e clientenan cu no a entrega nan formulario di declaracion dia 1 di December cu a pasa, automaticamente ta registra den e sistema cu e cliente ta haya 6 luna mas di tempo. E ora eynan su deadline ta bira 1 di Juni 2017.
E otro pregunta cu ta haya ta cu si e cliente mester entrega un carta pa pidi pa prolongacion di e termino, e contesta ta no. E cliente no tin mester di entrega un carta. Ta registra tur esakinan automaticamente den nan sistema. Kiermen e momentonan aki, e clientenan cu no a alcansa pa entrega nan declaracion di inkomstenbelasting, nan tin tempo ainda te dia 1 di Juni, 2017. En total nan ta haya 8 luna di tempo pa entrega nan declaracion. Dos luna ta e termino cu ley ta duna y 6 luna ta e termino cu departamento di Impuesto ta duna extra pa asina nan por completa nan declaracion y entreg’e.
Romano a agrega cu nan ta mantene un maneho di first in, first out. E clientenan cu a entrega nan declaracion prome, ta esunnan cu lo wordo procesa prome tambe. Un cliente cu ta spera placa di belasting bek y ta entrega su aangifte na Juni, tin cu spera cu e ta un di e ultimonan cu ta wordo procesa despues.