Departamento di Impuesto ta participa cu un bes mas ta organisa un campaña pa yuda yena e formulario di declaracion di inkomstenbelasting 2015. Di e forma aki Departamento di Impuesto kier yuda e clientenan cu ainda no a entrega nan formulario debi cu nan mes no por yena esaki.
E campaña lo start dialuna, dia 23 di januari y lo continua te cu dia 31 di januari proximo. Tur cliente cu ta cumpli cu e condicionnan pa ricibi ayudo ta
bon bini. Pa por haya ayudo e cliente no tin mester di haci un cita.
Kendenan por participa?
1. Tur persona soltero cu tin un entrada bruto di no mas cu Afl. 75.000,-.
2. Tur persona casa cu – hunto – tin entrada bruto di no mas cu Afl. 150.000,-.
No por brinda ayudo na esunnan cu tin un empresa propio of cu ta traha riba nan mes.
Centro di ayudo y horario
Lo duna ayudo na MFA Noord riba dianan 23 di Januari te cu 31 di Januari 2017, na MFA Noord for di 8′ or di mainta te cu 12 ‘ or di merdia y for di 1 ‘ or y 15 pa 4 ‘or di atardi.
Trece documento
Departamento di Impuesto ta pidi su clientenan pa trece e formulario di declaracion 2015 hunto cu tur documento necesario relaciona cu entrada y gasto, tanto na Aruba como den exterior, manera:
•resumen di salario y/of pension di trabou;
•resumen di entrada y gasto di huur di cas of apartamento;
•resumen di pension di biehes of pension di huerfano;
•carta di interes di banco y/of otro instancia;
•comprobante di prima di seguro di bida;
•comprobante di pago di alimentacion na ex-casa;
•comprobante di inscripcion di scol, recibonan di contribucion di scol, material di estudio y/of gasto di pasashi pa yiu cu ta den exterior haciendo un estudio cu no ta posibel na Aruba.
Ta importante pa inclui tur comprobante necesario den e declaracion. Tambe ta recomenda pa e cliente mes yena e seccionnan cu ta trata su informacion personal y di su famia. Ta trata aki di e seccionnan 3, 4, 5 y 25.
Si ta trata di un pareha casa, mester tin tambe e ‘persoonsnummer’ di e señora.