Sra. mr. Luanne Gomez- Pieters, directora di Departamento di Impuesto a splica mas over di e situacion pa cu situacion di Insel Air.
E reunion a bay den bon esfera, caminda cu por a yega na palabracionnan concreto pa cu e situacion di pagamento di belasting di Insel Air. Esey a culmina ayera unda a cumpli cu palabracionnan haci, y Departamento di Impuesto di nan banda a kita e beslag cu tin ariba cuentanan di banco di Insel AIr.
Esey ta duna Insel Air un tiki espacio, pa sigui cu nan operacionnan y tambe pa paga nan empleadonan na Aruba. Loke si ta keda para, segun Sra. Gomez Pieters ta e beslag riba propiedad pa garantisa pa den futuro no cumpli cu palabracionnan haci, e trayecto lo por sigui cana. Basicamente, e propiedad ta bira garantia pa un tempo cortico, cu si nada no tuma luga e ora por sigui cu e proceso di bay na vindishi.
Esey ta un proceso cu ta delinea door di ley, cu ta drenta den un situacion asina. E ta un garantia pa Departamento di Impuesto, ora tin incumplimento di pago. Pero den e caso aki, di Insel Air a yega na palabracionnan concreto. Nan a cumpli cu nan palabracionnan y ta duna di nan banda cu nan kier sanea e situacion y esaki lo duna nan espacio cu nan mester pa sigui cu nan plan di rescate pa cu e compania.
Departamento di Impuesto tabata tin combersacion cu accionistanan di Corsou y tambe, nan ta sirbi e mesun belang. Nan lo kier mira Insel Air Aruba den operacion, mescos cu Insel Air Corsou. Nan ta mira e importancia di e parti aki, y e conectividad, ora cu un compania manera Insel Air no ta bula mas entre e islannan, ta perde e conexion cu e personanan cu kier biaha entre e islanan ABC.
Sra. Gomez- Pieters a sigui bisa cu nan tin algun reto nan dilanti y e trayecto di Departamento di Aviacion ta un trayecto cu ta canando separa for di esun di Departamento di Impuesto.
Encuanto e tempo duna na Insel Air, manera tur compania nan mester paga dia 15 di siguiente luna, nan lo mester paga e impuestonan manera mester ta. Pa cu e otro debenan, tin un plan tambe di rescate cu nan lo mester cumpli cun’e. Asina Directora di Impuesto, Sra. mr. Luanne Gomez- Pieters a finalisa bisando.