Segun vocero di Departamento di Impuesto, Meverly Romano, polis tin cu tene bon cuenta cu autonan cu ta coriendo rond cu numbernan di auto traha di carton.
Tin sticker cu ta wordo traha ilegalmente y si polis haya e automobilistanan aki, nan ta core riesgo di haya un process verbaal y e consecuencia ta cu nan ta bay haya nan mes ta paga. Na e momentonan aki a ripara un otro fenomeno of kisas e tabata sosode caba, cu tin hopi cliente ta cumpra un auto, nan ta djis traha un plachi nan mes, kisas uno di carton y nan no ta worry, nan no a bin registra nan auto, pa nan haya number nobo. Pero nan ta djis skirbi un number riba dje cu ya caba tin un otro doño. Asina ta haya e personanan aki ta core cu plachi di carton cu number di otro hende riba nan auto.
Romano a haci un apelacion publico na cuerpo di polis, pa pone hopi atencion riba e casonan aki. A constata den algun caso di propio coleganan cu ta wak tipo di autonan aki riba caya y ta check si e auto ta registra y ta ripara cu e number ta registra riba un otro tipo di auto bao di otro nomber, etc.
Ta haya hopi persona cu ta abusa di e sistema y esaki ta algo cu Cuerpo di Polis lo mester controla riba caya.
Romano ta sigui splica cu tin periodicamente contacto cu Cuerpo di Polis pa e partinan aki. Normalmente tambe ora cu un deadline ta caduca, manera ultimo deadline cu a caduca pa number di auto tabata 30 di September, caminda cu sa manda un carta bisa cu e deadline a caduca, cu awor aki e ultimo kwartaal ta na vigor etc. Semper tambe tur aña na Februari, ta pone Cuerpo di Polis na altura pa pone tiki mas atencion pa personanan cu tin un plachi di number cu no ta esun cu Departamento di Impuesto a otorga. E por ta un sticker, e por ta carton, e por ta algo otro. E unico ora cu un persona por tin un otro plachi di number cu no ta esun di Departamento di Impuesto, ta e momento cu e tin un permiso cu e mag di haci’e pa tanten cu su plachinan ta wordo traha.
Tambe el a agrega cu na e momentonan aki tin riba 500 automobilista coriendo cu un plachi di number cu nan mes a traha, pero pasobra cu nan a haya un permiso cu nan mag di haci’e, pero e personanan aki no a bin busca nan plachi di number. Na e momentonan aki, e personanan aki lo ta coriendo cu un plachi di number cu nan mes a traha y cu un permiso cu a caduca hopi dia caba. Mientras tanto e plachinan aki ta den stock. Pero e automobilista no a worry pa bin busca su plachi di number. Pesey ta haci un apelacion na e grupo aki, cu si recientemente a haya un otro auto, b’a pidi un number nobo, por fabor bin busca bo plachinan. Tin tur e plachinan den stock na e momentonan aki. Ta trata di number te cu 67 mil.