Den un ambiente hopi ameno na Departamento di Salubridad Publico mes, a relata e historia di Departamento di Higiena di Salubridad Publico, cu a bay bek den tempo di lago. Varios di e ex directornan, a sa di aprecia kico ta e tareanan cu e departamento aki ta encera, entre otro control di cuminda, bebida y sanidad. E ta duna servicio y supervisa bao di e siguiente leynan manera Warenverordening, cu ta encera e calidad di cuminda y reglamentacion di higiena. Vergunningsverordening pa establecimento di horeca, logement, hotel, restaurant y slijt y asina por keda menciona. Aki tambe ta traha riba prevencion, duna informacion y guia pueblo riba tereno di salud en general. Departamento di higiena ta un departamento cu ta resorta bao di Directie volksgezondheid. E tin un papel hopi vital den infrastructura di Aruba y di servicio indispensabel cu ta hopi importante pa e bida diario di e pueblo di Aruba y e sector turistico.
Durante e evento aki, Frido Maduro, kende a fungi como hefe di 2006 pa aña 2008, a dirigi su mes na e publico. Actualmente e departamento ta wordo dirigi pa sra. Yvette Geerman, kende bao di su maneho, ta haciendo un tremendo trabao den control di calidad y demas trabaonan cu e departamento ta haci. Presente na e evento tabata tey presidente di Parlamento, Mervin Wyatt-Ras y tambe minister di Salubridad Publico, dr. Alex Schwengle.