Dialuna dia 23 di augustus te cu diabierna 26 di Augustus, 2021 Departamento di Enseñansa Aruba (DEA) ta organisa un proyecto cu lo prepara docente pa duna enseñansa segun e concepto di Educacion Profesional (“Beroepsonderwijs”).
Adviesbureau CINOP di Hulanda lo ta presente pa guia e proyecto aki. Riba diaranson, dia 25 di augustus, lo tuma luga firmamento di e protocol entre Directiva di Stichting Enseñansa Profesional Basico (SEPB) y Dienst Publieke Scholen (DPS). E momento special aki lo ta e comienso oficial (e “kick off”) di e trayecto cu e docentenan di EPB y EPI lo encamina pa contextualisa y introduci 12 opleiding nobo na Aruba na nivel 2, 3 y 4 di e structura di cualificacion nobo pa Enseñansa Profesional na Aruba, e asina yama “ABOkwalificatiestructuur.”
E actornan principal den e trayecto aki ta e docentenan di EPB y EPI cu den e aña nos dilanti lo tin e tarea importante di contextualisa 12 opleiding nobo basa riba e situacion y necesidad di Aruba. Esaki lo wordo haci bou guia di e Adviesbureau CINOP y dirigi pa Departamento di Enseñansa Aruba hunto cu e stuurgroep. E stuurgroep ta consisti di Directiva di Scol, Dirigente di Scol, Inspectoria di Educacion Profesional y Departamento di Enseñansa Aruba. E “kick off” simbolicamente ta representa e promer stap den direccion di introduccion y implementacion di e “Nationaal Beleid Beroepsonderwijs Aruba” cu ta enfoca riba Educacion Profesional na nivel 1, 2, 3 y 4. Maneho Segun e maneho nobo aki lo enfoca riba e desaroyo profesional di e studiante brindando e studiante oportunidad igual pa sigui su estudio; combina teoria y practica pa prepara e studiante pa drenta e mercado laboral di Aruba of pa· sigui studia na un nivel mas halto localmente of den exterior; ta aporta na e desaroyo di e studiante pa ta un persona responsabel y exitoso den nos· comunidad. E innovacion aki lo mester contribui pa halsa e calidad di enseñansa na Aruba.
A base di diferente cualificacion lo ekipa e studiante cu e competencianan pa logra nan metanan profesional. E innovacion aki ta beneficia e studiante y ta eleva e nivel di educacion y alabes tin beneficio pa e mercado laboral cu lo tin trahadonan miho ekipa den futuro. Colaboracion E colaboracion structural entre e stakeholders di Educacion y di Labor tambe ta un aspecto primordial di e proyecto aki. Un mercado laboral cu profesional miho prepara pa drenta e mercado por contribui na un miho experencia pa ful e comunidad y e progreso economico di nos pais.
Bou guia di CINOP e docentenan di ambos scol lo traha hunto pa desaroya y/o adapta materia den e contexto di Aruba. Asina ta garantisa cu e nivel 2, 3 y 4 di Educacion Profesional ta acopla miho na otro. Otro aspecto importante di e proyecto aki ta e Plataforma di Labor, cual lo duna nan perspectiva riba kico e tendencianan y necesidadnan ta riba e mercado laboral.
E Proyecto aki ta un iniciativa di Ministerio di Enseñansa cu lo no por a wordo ehecuta sin e sosten financiero di Ministerio di Economia y Finansa. Departamento di Enseñansa Aruba kier yama danki na tur e actornan envolvi cu e proyecto aki. Pa mas informacion relaciona cu e Nationaal Beleid Beroepsonderwijs Aruba por acudi na nos website www.ea.aw y busca Beroepsonderwijs den e alfabet menu riba e pagina principal. Tambe por sigui nos den social media via nos facebook y instagram pages @educationaruba pa keda na altura di tur informacion.