Departamento Di Cultura Aruba ta sostene Centro di Bario Brazil ya pa 7 aña caba cu e actividadnan aki. “ Nos ta aplaudi e iniciativa y continuidad di e logro den promove nos cultura bou di grandi y chikitonan”, segun Sr. Stanley Dabian.
Mirando cu Aruba ta dilanti porta di eleccion di Reinanan Cultural caminda cu Departamento di Cultura ta hopi contento cu e actividad aki di Centro di Bario Brazil ta haciendo esaki pa 7 aña caba. Mester realisa con importante nos Cultura ta y pa mantene bibo.
Departamento di Cultura tin un aprecio grandi pa Sr. Chico Harms, cu a trece e eleccion aki, caminda grandi y chikito por siña di nos cultura, por participa den algo cultural, cu por sigui e temanan cu ta wordo crea pa e eleccion aki, caminda cultura no mag muri nunca mas.
Proximanente, diasabra 19 di Augustus, e eleccion lo ta bay ta na Centro di Bario di Brazil. Varios ta e muchanan cu ta bay ta participando pa e Reina Cultura cu e biaha aki ta Baby Cultural, Chikitin Cultural y Prenda Cultural. Nan lo bin mustra nan aprecio pa nan cultura ariba e tema di Chanita.
Ta invita e pueblo di Aruba, pa bin presencia e eleccion aki y duna apoyo na nos chikitin pa e eleccion aki. Y mas cu claro, duna apoyo na Centro di Bario Brazil cu ta realisando esaki pa 7 aña.
Tambe lo tin e parada di Lanterna Cultural dia 1 di September y tambe e gran parada Cultural cu ta dia 3 di September y tambe tin e mercado cu semper ta bon bishita y bon organisa na Centro di Bario Brazil.
Departamento di Cultura ta aplaudi e iniciativa aki, ya cu ta educa over di nos cultura y grandi y chikito ta haya un sabor cultural y ta hiba un sabor cun’e di kico ta nos cultura. Sr. Chico Harms den e parada cultural, ta stress ariba e trahenan original, e animacion di nos musica tipico y cu e participacion ta bay den serio y bon anima, segun Sr. Stanley Dabian, di Departamento di Cultura.