Entrega bo obranan di artesania na DCA riba L.G. Smith Boulevard cu posibilidad pa bini na remarca pa e Seyo di Artesania. Artesania ta e ehempel bibo di creatividad di un homber y muhe cu balor y habilidad, capaz di uni un gran variedad di expresion y recoge e sentimento di un pueblo pa medio di nan ofishi”
Departamento di Cultura Aruba (DCA) conhuntamente cu e comision di Seyo Nacional Aruba ta extende na tur artesano un invitacion pa haci entrega di tur ‘material/obra’ nobo cu NO tin Seyo Nacional ainda. Riba diabierna 2 di november 2018 pa 10’or di mainta, lo tuma luga e evaluacion di obranan nobo. Aki ta caminda e comision lo bini hunto y p’asina pasa riba tur e criterianan necesario pa e ‘material/obra’ bini na remarca pa e Seyo Nacional di Aruba. Sea asina bon di trece bo obranan prome cu 1 di november 2018 prome cu 04:30 pm na DCA pa nan ser evalua.
E proceso di aplicacion ta tuma luga na Departamento di Cultura Aruba na Horizonte Building riba L.G. Smith Blvd. # 134 (riba Prome Piso). Por pasa caba na DCA y mester yena un formulario di aplicacion, mester trece un identificacion valido, un pasfoto como tambe un comprobante di adres y bo ‘material/obra pa bini na remarca pa e Seyo di Artesania. Por tuma contacto cu empleadonan di DCA pa mas informacion tocante e Seyo Nacional y tambe e proceso di aplicacion. Sea asina bon di tuma contacto cu personal di DCA via telefon 582-2185, durante e oranan di oficina.
E criterianan pa bin na remarca di un Seyo Nacional di Aruba ta como lo siguiente; e material/ obra mester ta/tin:
- traha na man; (No cu machine, pero cu herment manual senciyo)
- autentico, diseño original;
- consistencia den (re-) produccion di diseño y modelo;
- grado di experticio (tradicional) den trahamento di e producto;
- producto traha na Aruba mes;
- grado di uzo di material local;
- grado cu e producto ta refleha e tecnicanan di artesania tradicional.
E Seyo Nacional di Artesania ta pa promove y certifica nos productonan local. Creatividad ta parti importante di arte. Sea abo un di e proximo artesano certifica. Departamento di Cultura Aruba ta spera cu mas y mas artesanonan ta haci uzo di e oportunidad aki.