Relaciona cu e operacion di e aerolinea Conviasa na Aruba, e mandatario responsabel di e cartera di Transporte, sr. Chris Romero, ta duna e siguiente clarificacion: “Aruba tin un acuerdo bilateral cu Venezuela, cu ta regula e trafico aereo entre e dos paisnan. Mescos cu otro aerolineanan cu ta operando entre Aruba y Venezuela, a otorga e aerolinea Conviasa permiso di operacion na nos pais segun e oportunidadnan y condicionnan cu e acuerdo bilateral ta stipula. Den e acuerdo bilateral menciona ta stipula cu no mester tin un desventaha economico cu lo por ta un competencia inhusto pa e aerolineanan”, e mandatario a duna di conoce.
Ta asina cu principionan di ICAO ta enfatisa cu mester duna tur aerolinea un trato igual, sin tin di tuma na consideracion si ta propiedad di estado of propiedad priva.
Minister Chris Romero tambe a duna di conoce cu mester tene na cuenta e consecuencianan cu lo por surgi si dicidi di impone limitacionnan cu ta bay contra di loke tin stipula den e acuerdo bilateral existente. “Bay over na un tipo di boycott selectivo contra cierto aerolineanan lo por trece crea represalia innecesario contra di nos pais di parti di Venezuela. Esaki lo tin un efecto directo negativo y indesea contra nos aerolineanan local, como tambe lo afecta e conectividad entre e dos paisnan”, Minister Romero a declara.
Mester analisa tur aspecto y consecuencia den asuntonan di e indole aki prome cu tuma cualkier accion. Mester considera acontecimentonan cu a tuma lugar den un pasado no mucho leu y cu a afecta nos isla considerablemente.
