Dialuna mainta Minister Paul Croes a tene un Reunion importante cu director nobo di sociale zaken. Un reunion di orientacion y bon bini na sra. Glenda Hernandez kende desde 1 September 2016 lo ta e directora nobo di Departmanento di Asuntonan Social. Pa algun tempo caba tabata tin un proceso andando, unda a busca solicitantenan den e sector aki, tanto na Aruba como den exterior, pa asina asumi e function di director di e departamento. Despues di pasa e proceso manera mester ta, sra. Hernandez a resulta e persona cu ta cumpli cu tur criteria necesario pa por asumi e function importante aki cual ta directora di Departamento di Asuntonan Social. Departamento di Asuntonan social ta un departamento hopi grandi di Gobierno na unda ta brinda e servicio social na nos comunidad den diferente area. Ora di menciona diferente area, ta referi na entre otro ayudo di bijstad, apoyo social, apoyo psicologico pero tambe tur loke ta trata derechonan di mucha y di un ser humano. Minister Paul Croes a duna di conoce cu dialuna mainta durante reunion cu sra. Hernandez a sa di comparti y dialoga riba e temanan aki pa asina por sigui brinda Aruba e mihor servicio social posibel. Banda di esaki Minister Croes a pone enfoke riba su vision pa loke ta trata e direction cu e minister kier bay pa cu e tereno social di Aruba. Minister Croes su vision ta pone enfasis riba personanan cu limitacion, personanan financieramente vulnerable, fortifica famianan den nos sociedad y nos hobennan. Minister Paul Croes ta contento cu desde prome di September, por conta cu un directora nobo na DAS cu por yuda brinda e apoyo social mas miho na nos comunidad. Banda di esaki, loke tambe ta hopi importante ta pa sra. Hernandez por apoya e trahdornan di e departamento pa miho motivacion, manera di trabow, infrastructura etc. Minister Croes ta convenci cu e directora nobo lo trece cambionan positivo pa e departamento y ta desea sra. Hernandez exito den su function nobo.